ԱՄՆ պետդեպարտամենտի 2018 ֆինանսական տարվա բյուջեի նախագիծը թույլ կտա դիմակայել ռուսական ագրեսիային՝ երեքշաբթի հայտարարել է պետդեպարտամենտում արտաքին օգնության տրամադրման բաժնի պետ Գերի Սասթրին, հայտնում է RIA Novosti-ն:
«Բյուջեի այդ նախագիծը մեզ թույլ կտա Եվրոպայում, Եվրասիայում և Կենտրոնական Ասիայում դիմակայել ռուսական ագրեսիային և ազդեցությանը»,- հայտարարել է նա լրագրողներին: Նրա խոսքերով` խոսքը գնում է «այդ շրջաններում ԱՄՆ-ի ազգային անվտանգությանն ու տնտեսությանը վերաբերվող շահերի բավարարման մասին»:
Երեքշաբթի օրը ԱՄՆ վարչակազմը ներկայացրել է 2018 ֆինանսական տարվա բյուջեի նախագիծը, որը սկսվում է այս տարվա հոկտեմբերի 1-ից: Այժմ այդ փաստաթուղթը պետք է հաստատվի Կոնգրեսի երկու պալատների կողմից, սակայն մի շարք օրենսդիրներ արդեն խոսում են այն մասին, որ դա տեղի չի ունենա: