Աջափնյակ վարչական շրջանում հետընտրական պարգևատրումները շարունակվում են։ Շուրջ 18.000 քվե ստացած ԱԺ նախկին նախագահ Գալուստ Սահակյանի որդին՝ ՀՀ կառավարությանն առընթեր պետական գույքի կառավարման վարչության պետ Արման Սահակյանն, ինչպես հայտնի է, հրաժարվեց պատգամավորական մանդատից՝ վերադառնալով իր նախկին պաշտոնին, բայց այդքան ջանք ու եռանդ հո միայն նախկին պաշտոնին մնալու համար չէր ծախսել։ 18.000 քվեն փաստորեն Աջափնյակի բնակիչների «քթից է բերվելու»։
Արդեն գրել էինք, որ վերջինիս կինը՝ Սեդա Հակոբյանը, որն այժմ Աջափնյակի թիվ 38 մանկապարտեզի տնօրենն է, առաջիկայում նշանակվելու է Պեյո Յավորովի անվան թիվ 131 հիմնական դպրոցի տնօրեն՝ նախկին տնօրեն Գրիգոր Սաֆարյանն էլ «կամավոր» անցնելու է թոշակի։ Իսկ 38 մանկապարտեզի տնօրենի թափուր պաշտոնը, ամենայն հավանականությամբ, կզբաղեցնի Գալուստ Սահակյանի մյուս հարսը՝ Տիգրան Սահակյանի կինը, որն ի դեպ ևս մանկավարժի կրթություն չունի։
Գրել էինք նաև, որ Սահակյանները իրենց թիմակից «Ֆազ» մականունով հայտնի Սերգեյ Գրիգորյանի եղբորը՝ նախկինում ԲՀԿ, իսկ այժմ էլ ՀՀԿ ավագանու անդամ Գրիգոր Գրիգորյանին խոստացել են Աջափնյակի թաղապետի պաշտոնը։ Վերջինս թե՛ խորհրդարանական, և թե՛ Երևանի ավագանու ընտրություններում ջանք ու եռանդ չի խնայել ՀՀԿ-ի օգտին ցանկալի ձայներ հավաքելու համար։ Գրիգորյանի կինն էլ՝ Լուսինե Առաքելյանը դեռ որպես խորհրդարանական ընտրությունների պարգևատրում ստացել էր Աջափնյակի Գուրգեն Մարգարյանի անվան թիվ 41 մանկապարտեզի տնօրենի պաշտոնը։ Վերջինս Աջափնյակի թիվ 40 մանկապարտեզում անգլերենի ուսուցչուհի է եղել։ Սկզբում որոշել են վերջինիս որպես պարգևատրում նշանակել հենց այդ մանկապարտեզի տնօրեն, սակայն տեղի տնօրեն Աննա Հարությունյանին հեռացնել չի հաջողվել։ Փոխարենը Սահակյանները սահուն կերպով հեռացրել են թիվ 41 մանկապարտեզի տնօրենին, որն ի դեպ Գագիկ Բեգլարյանի մորաքրոջ հարսն է՝ Հայկանուշ Միքայելյանը։ Վերջինս «բյուլետեն » է ձևակերպել՝ արձակուրդ գնացել, այդ ընթացքում ազատվել աշխատանքից։ Միքայելյանն իրեն աշխատանքից ազատելու փաստն այժմ վիճարկում է դատարանում։ «Ինչ ուզում է լինի՝ հետ եմ վերադառնալու»,- նեղ շրջապատում հայտարարել է մանկապարտեզի նախկին տնօրենը։