«Ելք» դաշինքի պատգամավոր Մանե Թանդիլյանը այսօր Ազգային ժողովում դիմելով Ներքին գործերի, ազգային անվտանգության և պաշտպանության մշտական հանձնաժողովի նախագահի թեկնածու Կորյուն Նահապետյանին, նշեց, որ մեր բանակում կա խնդիր, երբ ընտանիքներն իրենք են ապահովում զինվորների առաջին անհրաժեշտության և հիգիենիկ պարագաները: Պատգամավորը հետաքրքրվեց, թե ինչ լուծումներ և ինչ վերահսկողական լիազորություններ են պատրաստվում իրականացնել:
«Իրապես Զինված ուժերում ծառայության գրավչության ապահովման խնդիրը մեզ համար գերակայություն է: Այսօր ՀՀ պետական բյուջեով նախատեսված են ԶՈւ-ում ծառայության կազմակերպման և իրականացման համար, այդ թվում նաև մեր զինծառայողների բնականոն ծառայության ապահովման համար անհրաժեշտ պայմաններ, միջոցներ նույնպես նախատեսված են», – նշեց Կորյուն Նահապետյանը և ընդգծեց՝ իհարկե՛, հնչել են որոշակի մտահոգություններ ու այդ մտահոգությունների հետ կապված քննարկումներ եղել են։
«ՀՀ պաշտպանության նախարարը պետական բյուջեի կատարման հաշվետվության քննարկման ժամանակ տվել է համապատասխան պարզաբանումներ, հիմնականում այդ պարզաբանումները բավարարել են, բայց այն, որ կան որոշակի խնդիրներ ու դրանց կապակցությամբ պետք է տրվեն լուծումներ, դրանում որևէ կասկած չկա», – ասաց Նահապետյանը։
ՀՀԿ-ական պատգամավորը նշեց, որ Պաշտպանության ու անվտանգության հարցերի մշտական հանձնաժողովը հետևողակակն է լինելու, որ Զինված ուժերի բնագավառում ունենանք առավել բարենպաստ իրավիճակ։
Մանե Թանդիլյանն արձագանքեց. «Պատեհ չէ, որ հիգիենայի պարագաները մատակարարում են ծնողները»:
«Որոշ դեպքերում մոտեցումը չափազանցված է: Իհարկե ամեն ծնող ցանկանում է իր զավակի համար առավել լավ պայմաններ ստեղծել, սակայն այնպես չէ, որ պետությունը նվազագույն բավարար պայմանները չի ստեղծում: Իհարկե ցանկալի կլինի, որ որակական փոփոխություններ կատարենք»,- նշեց Կորյուն Նահապետյանը:
Մանրամասները՝ տեսանյութում: