Կառավարությանն առընթեր պետական եկամուտների կոմիտեում ներկայումս իրականացվելու են կառուցվածքային փոփոխություններ, որոնք նպատակաուղղված են հարկային վարչարարության կատարելագործմանը, կոմիտեի համակարգի ռեսուրսների առավել արդյունավետ օգտագործմանը, կոռուպցիոն ռիսկերի նվազեցմանը, կոմիտեի գործառույթների առավել լիարժեք և նպատակային իրականացմանը: Այդ նպատակով նախօրեին կառավարությունը փոփոխություններ կատարեց նախկինում ընդունած որոշումներից մեկում՝ կոմիտեի կանոնադրության մեջ և աշխատակազմի կառուցվածքում: ՊԵԿ նախագահի պաշտոնակատար Վարդան Հարությունյանն ասաց, որ նախատեսվում է լուծարել հարկային (տարածքային) տեսչությունները` վերջիններիս փոխարեն ստեղծելով 3 վարչություն և դրանք ներառել կոմիտեի աշխատակազմի կառուցվածքային ստորաբաժանումների կազմում` որպես վերադաս հարկային մարմնի ստորաբաժանումներ: «Կառուցվածքային փոփոխությունների արդյունքում նախատեսվում է նաև կրճատել մաքսատների թվաքանակը և դրանք որպես վերադաս մաքսային մարմնի վարչություններ, նախատեսել կոմիտեի աշխատակազմի կառուցվածքում: ՀՀ օրենսդրությամբ սահմանված կարգով՝ վերոնշյալ գործընթացի արդյունքում նախատեսվում է շուրջ 483 հաստիքների կրճատում»,- ասաց Հարությունյանը:
Կոմիտեի կառուցվածքային ստորաբաժանումներից նախատեսվում է լուծարել Ակցիզային դրոշմանիշերի և դրոշմապիտակների հաշվառման բաժինը` հաշվի առնելով այն հանգամանքը, որ վերջինիս գործառույթներն իրականացվելու են ստեղծվելիք Հարկ վճարողների սպասարկման վարչության, Փոքր հարկ վճարողների, ինչպես նաև Խոշոր և միջին հարկ վճարողների տեսչություն-վարչությունների կողմից: Միաժամանակ նախատեսվում է կոմիտեի աշխատակազմում ստեղծել Ոչ առևտրային կազմակերպությունների հսկողության բաժին:
Հայաստանի գործատուների հանրապետական միության նախագահ Գագիկ Մակարյանը «Առաջին լրատվական»-ի հետ զրույցում ողջունեց ՊԵԿ-ում սկսված կառուցվածքային փոփոխությունները: «Հատկապես ողջունելի է տեսչությունների կրճատումը, քանի որ դրանք այն մարմիններն են, որոնք մեծամասամբ պրոբլեմներ են առաջացնում կոռուպցիոն ռիսկերի տեսանկյունից, ոչ ճիշտ տեսչական ստուգումներ են իրականացնում, ստուգումների արդյունքում փող են վերցնում և աչք են փակում խախտումների վրա, չեն գրանցում դրանք, և վերջում դա ավելորդ վարչարարություն է առաջացնում: Դրա համար տեսչական մարմինների բարեփոխումները օգտակար են»,- ասաց Մակարյանը:
Ինչ վերաբերում է Պետական եկամուտների կոմիտեին, ապա, Մակարյանի խոսքերով՝ կոմիտեն բավական դրական քայլերով գնում է դեպի բարեփոխումներ և այդ կոնտեքստում ողջունելի է նաև կադրային փոփոխություններն ու համակարգը երիտասարդ կադրերով համալրելը: «Եթե համակարգը օպտիմալացվի, երիտասարդ կադրեր բերվեն համակարգ, ապա տեսչական մարմինները կառողջանան, քանի որ այդ մարմինները ունեն շատ լուրջ կարգավորիչ դերակատարություն: Իսկ երբ դրանք իրենց կարգավորիչ դերակատարությունից շեղվում են, դառնում են մի խայտառակ բան, որն ավելի վնաս է, քան այն, որ այդ տեսչական մարմինն առհասարակ գոյություն չունենա: Եթե ինքն իր բուն ֆունկցիան չի կատարում, սկսում է այլ ֆունկցիա կատարել և գեներացնել բոլորովին այլ երևույթներ: Դրա համար մենք ողջունում ենք կառավարության այս փոփոխությունները, որոնք իրականացնելիս լայնորեն քննարկվում են նաև հասարակական սեկտորի հետ»,- հավելեց Մակարյանը:
Լուսանկարը՝ Panorama.am-ի
