«Ինձ համար Ձեր կերպարը, որպես Արտաքին հարաբերությունների հանձնաժողովի նախագահի, անհամատեղելի է»,-այսօր խորհրդարանական նիստի ժամանակ դիմելով Արտաքին հարաբերությունների հանձնաժողովի նախագահի թեկնածու Արմեն Աշոտյանին՝ ասաց «Ելք» դաշինքի պատգամավոր Էդմոն Մարուքյանը: Նա նշեց, որ իր այս մտահոգությունն ունի 2 պատճառ, նախ որ Աշոտյանն, ըստ Մարուքյանի, քաղաքական ընդդիմախոսների նկատմամբ հանդուրժողական վերաբերմունք չունի, և բացի դրանից՝ ՀՀԿ-ի արտաքին կապերի պատասխանատուն լինել չի նշանակում, որ խորհրդարանն էլ ՀՀԿ-ի արտաքին կապերի խնդիրներն է լուծելու:
«Եթե Ձեզ համեմատում եմ Արտակ Զաքարյանի հետ, բավական լուրջ տարբերություններ կան: Մեզ հաջողվել է, նրա հետ ունենալով քաղաքական տարաձայնություններ, աշխատել նրա հետ, հիմա մտահոգություն և կասկածներ ունեմ, որ չենք կարող Ձեզ հետ էլ աշխատել և որ կկարողանաք այդ կարևոր հանձնաժողովը ղեկավարել»,- շարունակեց Մարուքյանը:
«Իմ պատասխանից կախվա՞ծ լինելու է ձեր քվեարկությունը»,- հարցրեց Արմեն Աշոտյանը՝ հավելելով՝ իմ հանդուրժողականությունն անսահման է, ապա շարունակեց. «Երբ ես, բժիշկ լինելով, 2005 թվականին մտա խորհրդարան, շատերն ասում էին՝ ի՞նչ կապ ունի բժիշկը քաղաքականության հետ: Այսօր տեսնում ենք, թե բժիշկներն ինչ բարձունքի են հասնում քաղաքականության մեջ, հետո ասում էին՝ Կրթության նախարարն ո՞ւր, բժիշկն ո՞ւր: Երբ որ նախարար էի ու մտա Ֆեյսբուք, ձեր գործընկներից մեկն ինձ ասում էր՝ ինչ Ֆեյսբուք, ձեզ լրջանալ է պետք: Այսօր արդեն մի քանի ամիս է՝ նա «հացս ձեռիցս տարել է»: Պատասխանս չի ենթադրում անհամեստություն, որ գիտեք՝ այո, ես կարող եմ…:
Ես էլ եմ պարոն Զաքարյանի մասին բարձր կարծիքի, երբեք չեմ համեմատել 2 տարբեր անձանց, ինչպես օրինակ երբեք չեմ համեմատել Ձեզ պարոն Փաշինյանի հետ, որ հասկանամ, թե ինչու պարոն Փաշինյանը դարձավ ֆրակցիայի ղեկավար, իսկ դուք՝ ոչ: Ձեր քաղաքական ուժի որոշումն է եղել:
Մեր քաղաքական որոշումն է եղել ներկայացնել իմ համեստ անձի թեկնածությունը… Ինչ վերաբերում է խորհրդրանական դիվանագիտությանը, ապա դրա մեջ կուսակցությունների դերն ավելի լավ կգնահատեք, երբ ձեր կուսկացությունը զարգանա, մեծանա…»,- նշեց Աշոտյանը:
Մանրամասները՝ տեսանյութում:
