«Ազգային ժողովում քննարկվում է քաղաքակն մեծամասնության կողմից ներկայացված նախագիծը, որը կոչվում է «ՀՀ վեցերորդ գումարման Ազգային ժողովում Մարդու իրավունքների և հանրային հարցերի հանձնաժողովը փակելու մասին»: Եվ Ելք դաշինքի կողմից ներկայացվել է ալտերնատիվ նախագիծ, որը կոչվում է «ՀՀ վեցերորդ գումարման Ազգային ժողովում Մարդու իրավունքների և հանրային հարցերի հանձնաժողովը չփակելու մասին»: Եվ խոսքը այն մասին չէ, թե հանձնաժողովը որ խմբակցությունն է ղեկավարելու»,- այս մասին ԱԺ այսօրվա նիստում ասաց «Ելք» դաշինքի պատգամավոր Էդմոն Մարուքյանը:
Նա հիշեցրեց, որ երբ Տարածքային կառավարման նախարարությունն ու ԱԻՆ-ը առանձնացնում էին, ՀՀԿ-ն հիմնավորում էր, թե քաղաքական նպատակահարմարությունից ելնելով են դա անում. «Երևի մոռացել եք, մենք այստեղ ենք, որ հիշեցնենք»:
Մարուքյանը նշեց, որ իրենք պաշտպանում են ժողովրդի և իրենց շահերը, նաև օրենքի շահերը. «Եթե ընդդիմությունն ինքն իր շահերը չկարողանա պաշտպանել, բա ՀՀ քաղաքացիների շահը ո՞նց պետք է պաշտպանեն: Ասում եք՝ պաշտոն եք խնդրում: Մենք որևէ մեկից որևէ բան չենք խնդրում: Մենք մեզ հասանելիքն ենք պաշտպանում… Ինչո՞ւ ոչ 8, որովհետև ՀՀԿ-ի մի հանձնաժողովը նվազում է, դառնում է 5, իսկ ԲՀԿ-ինը մնում է 3, դրա համար դուք չեք ուզում, որ լինի 8, որ ձեր մի մարդուն ավել պաշտոն տաք: Հիմա ո՞վ էր պաշտոնից խոսում, կարո՞ղ եք ասել, որ հիմա ում տալիս եք այդ պաշտոնը, հրաժարվելու է մեքենայից կամ իր աշխատավարձը մանկատներին է փոխանցելու»:
Մարուքյանի խոսքով՝ «Ելքին» որ հանձնաժողովն էլ տան, «Ելքը» իր վրա դրված բեռը կկատարի պատվով, «իսկ թե ով կկատարի, ոնց կկատարի, ՀՀԿ-ի սիրելի բժիշկները, որոնք նախկինում ԿԳ նախարար են աշխատել, թող չմտահոգվեն»:
Էդմոն Մարուքյանը հիշեց. «5-րդ գումարման ԱԺ-ում, երբ որ ես նոր էի ընտրվել, ինձ ասում էին՝ դու error ես, նախատեսված չես եղել, սիստեմնի սխալի պատճառով ես հայտնվել խորհրդարանում: Մի իրավիճակ էր, որ ես չէի կարող մի քանի հանձնաժողովներում աշխատել, ընդունվեց ԱԺ կանոնակարգ օրենք, նաև իմ լոբբինգով, որ մի պատգամավորը կարող է 2-3 հանձնաժողովի անդամակցել: Այն ժամանակ ՀՅԴ-ն ուներ 5 մանդատ և 3-ական հնարավորություն տրվեց, 12 հանձնաժողով փակվեց…»:
Էդմոն Մարուքյանն ընդգծեց, որ կա քաղաքական որոշում՝ այնպես անել, որ «Ելք» խմբակցությունը չունենա հանձնաժողով. «ՀՀԿ այս նախագիծն ամբողջությամբ հակասության մեջ է մտնում երեկ այստեղից հնչեցված ՀՀ նախագահի ելույթի հետ»:
Մանրամասները՝ տեսանյութում: