ԱԺ ՀՀԿ պատգամավոր Արմեն Աշոտյանը, ելույթ ունենալով «Ելք» դաշինքի պատգամավոր Արամ Սարգսյանի ելույթից հետո, խորհուրդ տվեց հանձնաժողովների կրճատման հարցը անձնական դաշտ չտեղափոխել:
Նրա խոսքով՝ քաղաքական տեսակետից կոռեկտ չէ այն հարցադրումը, ըստ որի՝ քաղաքական մեծամասնությունը դեմ է ընդդիմությանը տալ հանձնաժողովի նախագահի դեր:
Նշենք, որ ՀՀԿ-ն առաջարկում է 12 մշտական հանձնաժողովների փոխարեն ունենալ 9-ը, որի դեպքում «Ելքը» չի կարող հանձնաժողովի նախագահի իրավունք ունենալ: Իսկ «Ելքն» առաջարկում է թողնել 10-ը՝ չկրճատելով Մարդու իրավունքների հանձնաժողովը:
Աշոտյանը նշեց, որ եթե Էդմոն Մարուքյանը լիներ ակնառու գյուղատնտես, այլ ոչ թե իրավաբան, ուրեմն իր գործընկերները կհիմնավորեին, որ գյուղատնտեսության հանձնաժողովը չպիտի փակվի, եթե լիներ լավ բժիշկ, կհիմնավորեին, որ առողջապահության հանձնաժողովը չի փակվելու, որ «դա կենսական նշանակություն ունի, որովհետև մայրություն, մանկություն, հիվանդություն և այլ հարցեր կան»:
Աշոտյանն ընդգեց, որ անձնական ամբիցիաներն են բավարարվում նման կերպ: «Ընդդիմության դերը չի պայմանավորվելու նրանով՝ մեր գործընկերները կունենա՞ն հանձնաժողովի նախագահ, թե ոչ»,-ասաց նա:
Աշոտյանի ելույթից հետո Արամ Սարգսյանն արձագանքեց. «Վաղուց անցել եմ այն տարիքից, որ անձնական ամբիցիաներս դրսևորելու կամ կայանալու խնդիր ունենամ ու կարծում եմ՝ այդ խնդիրը բարեբախտաբար չունեն ո՛չ Էդմոն Մարուքյանը, ո՛չ Նիկոլ Փաշինյանը, ո՛չ էլ Արտակ Զեյնալյանը: Մենք ասում ենք, որ 10 հանձնաժողով կրճատելը ճիշտ չէ, որովհետև ԱԺ-ին չափից ավելի շատ հնարավորություններ եք տվել, ու ԱԺ-ից 80 մլն կրճատում եք` միլիարդները նախագահականում և կառավարություն թողած: 11-ն էլ քիչ չի, դարձրեք 11 ու 11-րդն էլ տվեք ՀՅԴ-ին»:
Ա. Սարգսյանը հավելեց, որ հարցը ոչ թե իրենց հանձնաժողովի ղեկավարություն չտրամադրելն է, այլ այն, որ խորհրդարանական համակարգի պարագայում խորհրդարանի լիազորությունները մեծացել են, իսկ ֆինանսավորումը կրճատվել է:
Մանրամասները՝ տեսանյութում: