ԱԺ-ում քննարկվում է մշտական հանձնաժողովների ձևավորման հարցը, Հանրապետական խմբակցությունն առաջարկել է ԱԺ մշտական հանձնաժողովները 12-ից դարձնել 9, իսկ «Ելք» դաշինքը ներկայացրել է իր նախագիծը, որով առաջարկել է հանձնաժողովների թիվը դարձնել 10-ը, որպեսզի «Ելքը» նույնպես հնարավորություն ունենա հանձնաժողով ղեկավարել:
«Ելք» դաշինքի պատգամավոր Արամ Սարգսյանը, հանդես գալով ելույթով, ընդգծեց, որ հանձնաժողովների կրճատման որոշումն իրավական չէ, այլ քաղաքական: Արամ Սարգսյանը նշեց, թե Մարուքյանի հարցադրումը, թե ինչու 9 հանձնաժողով մնա, եթե ոչ 8-ը, ՀՀԿ-ի արձագանքը հիմնավորեց, որ դա քաղաքական որոշում է: Ա. Սարգսյանի խոսքով՝ «Ելք»-ին ԱԺ Մարդու իրավունքների պաշտպանության հանձնաժողովը չտալը պատվիրված է: Նա նշեց, որ, ընդհանուր առմամբ իշխանության տեսակետը ներկայացնող զեկուցող Թովմասյանի հետ համաձայն է միայն այն հարցում, որ ԱԺ-ում կլինեն, թե չէ, մարդու իրավունքների համար պայքարել ու պայքարելու են և այստեղ երկու տեսակետ լինել չի կարող:
«Ես ուզում եմ հասկանալ՝ լավ, նախագահը ձերն է, ԱԺ նախագահը, վարչապետը, դատախազությունը ձերն է, ի՞նչ մտավախություն ունեք, ի՞նչն է խանգարում, որ Մարդու իրավունքների հանձնաժողովը «Ելք»-ինը լինի, ի՞նչն է խանգարում, որ ՄԻՊ-ն իրենը լինի»,-ասաց նա և նշեց, որ կարծում է, որևէ խնդիր չկա և պետք էլ չէ հիմնավորել, որ եթե խելոք պահեք, կտեսնենք՝ 6 ամիս հետո տանք, թե չէ:
Բա ասում էիք, որ սա նոր խորհրդարան է, նոր հիմքեր ու տրադիցիաներ պետք է դնենք, որ ախպոր պես պետք է աշխատենք, այ ՀՀԿ ախպեր ջան, ձեր նախագահն էլ էր էտ ասում, որ փոքրամասնության կարծիքը լսել է պետք: Ասում եք չէ՝ մենք շատ ենք, շատ պետք է գնանք: Դ՛ Օնտի բանաձևը օրինակ դարձրած, ձեր վարչապետի ասած, դոմփելով գնում եք, է հետո՞, ի՞նչ եք ստանալու էտ դոմփելուց, ինչ եք տալու երկրին, ինչ-որ բա՞ն եք փոխելու»,-ասաց նա և նշեց, թե ամեն ինչ անում են, որ հիմնավորեն, որ քանի որ մեծամասնություն են, մնացածն անելիք չունեն:
Էդ էդպես չի, եթե ուզում եք շենք կառուցել, առավել ևս հիմքը վատ է լցված՝ 10 000 դրամ ընտրակաշառքներով, անկյունաքարը ճիշտ դրեք, հակառակ դեպքում վատ է լինելու: Կոչ եմ անում, որ նայեք, որ իսկապես ՄԻՊ-ը «Ելք»-ին տալով, այնտեղ ներկայացված իրավաբան ներկայացուցիչներին լավ իմանալով, ՀՀ-ն այդ ոլորտում կունենա լուրջ առաջընթաց: Էս էն թեման է, որը կբարձրաձայնվի աշխարհով մեկ, հանրության մեջ: Կանեք՝ ապրեք, չեք անի՝ մենք միևնույն է մեր գործն անելու ենք»,- նշեց Արամ Սարգսյանը:
Մանրամասները՝ տեսանյութում: