Ռուսաստանի քաղաքացիություն ունեցող ադրբեջանցի երիտասարդները բողոքում են, որ իրենց ստիպում են ծառայել ադրբեջանական զինված ուժերում: Ինչպես հաղորդում է Rusarminfon-ն, այս մասին Դերբենտում հայտարարել է ՌԻԱ «Դերբենտ» կայքի գլխավոր խմբագիր Միլրադ Ֆաթուլաևը:
«Երիտասարդներից շատերը, որոնք դարձել են Ռուսաստանի քաղաքացի և հրաժարվել Ադրբեջանի քաղաքացիությունից, արդեն ծառայել են ռուսական բանակում: Բայց 2016թ. սկսած այդ երիտասարդները չեն կարողանում այցելել իրենց հարազատներին, քանի որ սահմանը հատելիս ադրբեջանական կողմը փորձում է ստիպել նրանց զինվորական ծառայություն անցնել: Ռազմական ոստիկանության նախաձեռնությամբ նրանց դեմ հետախուզում է հայտարարվել: Փաստարկներն առ այն, որ այդ երիտասրադներն արդեն Ադրբեջանի քաղաքացիներ չեն, հաշվի չեն առնվում»,-ասել է Ֆաթուլաևը:
Այս հարցի շուրջ մամուլի ասուլիսին Դաղստանում մասնակցել են նաև խնդրի հետ բախված երիտասարդները: Նրանց խոսքով՝ նման դեպքերի թիվը շատ է, բայց մարդիկ վախենում են խոսել այդ մասին: Երիտասարդների մի մասն էլ վախենում է Ադրբեջանում մնացած հարազատների համար, որոնց վրա ճնշումներ են գործադրվում: Երիտասարդները նաև նշել են, որ երբ փորձում են պարզել հանգամանքները, բարձրաստիճան պաշտոնյաները հիմնվում են Իլհամ Ալիևի հրահանգի վրա, ըստ որի արգելվում է հաստատել Ադրբեջանի քաղաքացիությունից հրաժարվելու հայցը: