ԱԺ-ն մտադիր է լուծարել մի քանի մշտական հանձնաժողովներ: ԱԺ պատգամավոր Էդմոն Մարուքյանն «Առաջին լրատվական»- ի հետ զրույցում կարծիք հայտնեց, որ ԱԺ մշտական հանձնաժողովների թիվը կրճատվում է, որպեսզի «Ելք» դաշինքը չունենա հանձնաժողով ղեկավարելու հնարավորություն։
«10 հանձնաժողովը 105 պատգամավորի դեպքում ԱԺ-ում կարող է շատ հանգիստ աշխատել, այսինքն՝ պատգամավորների թվի կրճատման արդյունքում կարող է միայն երկու հանձնաժողով կրճատվել»:
Մարուքյանին մտահոգում է հատկապես այն, որ կրճատվող հանձնաժողովներից են Մարդու իրավունքների պաշտպանության և Հանրային հարցերի մշտական հանձնաժողովները։
Նրա խոսքով՝ սա ուղերձ է միջազգային հանրությանը և առաջին հերթին մեր հասարակությանն այն մասին, որ մարդու իրավունքների պաշտպանության կարիք ընդհանրապես չկա, իբրև թե մեզ մոտ այդ հարցերը լուծված են. «Մարդու իրավունքների հանձնաժողովը փորձում են միացնել գերծանրաբեռնված՝ Պետաիրավական հարցերի հանձնաժողովին։ Ես եղել եմ այդ հանձնաժողովի անդամ, գիտեմ, որ այդ հանձնաժողովը իր ունեցած օրենսդրական փաթեթներն անգամ չի հասցնում քննարկել»:
Մարուքյանի դիտարկմամաբ՝ մեր երկիրը գնալով մեկուսանում է քաղաքակիրթ աշխարհից: Նա նշեց, որ «Ելք» դաշինքը Ասոցացման պայմանագրի ստորագրման կողմնակից է. «Մենք իշխանության չենք եկել, հիմա լոբբինգ կանենք, որ իշխանությունը ստորագրի: Այդ դեպքում Հայաստանը կարող է զարգանալ»:
Մանրամասները՝ տեսանյութում: