Սերժ Սարգսյանը խորհրդարանի նախագահի պաշտոնի համար առաջարկեց հայտնի բժիշկ, պատգամավոր Արա Բաբլոյանի թեկնածությունը: Քաղաքական իմաստով` բացարձակապես հաջող լուծում չէ, եթե նկատի ունենանք, որ Բաբլոյանն արդյունավետ պատգամավոր չէ` չնայած հանձնաժողովի նախագահ լինելուն, հրապարակային քաղաքական գործիչ չէ և արժեքային որոշակի համակարգի կրող չէ` գերադասելով մշտապես լինել իշխանությունների կողքին: Սակայն Սերժ Սարգսյանը երբեք չի առաջնորդվում քաղաքական տրամաբանությամբ` առաջնությունը տալով համակարգային շահերին: Այս տեսանկյունից` Բաբլոյանն, ըստ ամենայնի, կոմպրոմիսային ֆիգուր է և անկախ իր պաշտոնավարման ժամկետից, կարող է հանգիստ «համակեցվել» թե Սերժ Սարգսյանի և թե Կարեն Կարապետյանի հետ` նայած, թե նրանցից ով 2018-ին կստանձնի իշխանության ղեկը:
Ըստ հավաստի լուրերի` խորհրդարանի նախագահի ընտրության հարցում Սերժ Սարգսյանի և Կարեն Կարապետյանի միջև հակասություններ են եղել: Վարչապետը դեմ է եղել Էդուարդ Շարմազանովին ու Արմեն Աշոտյանին, Սերժ Սարգսյանն, իր հերթին, մերժել է Արփինե Հովհաննիսյանի և Սամվել Կարապետյանի եղբոր` Կարենի թեկնածությունները: Ի վերջո, կայացել է կոմպրոմիս` Արա Բաբլոյանի դեմքով: Կարապետյանը Հայաստանում քաղաքական թիմ չունի ու հաճախ մարդկանց յուրային է համարում սիմպատիայի հիմքով կամ համատեղ աշխատանքի բերումով: Այդպես եղավ Արփինե Հովհաննիսյանի պարագայում, այդպես է թերևս Բաբլոյանի դեպքում, որը խորհրդարանական քարոզարշավի մարզային այցերի ժամանակ ջանասիրությամբ գովաբանում էր Կարեն Կարապետյանին: Այնուամենայնիվ, Բաբլոյանը Սերժ Սարգսյանի շրջապատի մարդ է, նրա մերձավորը, և ստեղծված կոնֆիգուրացիան ավելի ձեռնտու է Սարգսյանին:
Մեծ հաշվով` ԱԺ նախագահի համար մղվող ներհամակարգային պայքարը վարչապետը տանուլ է տվել` չկարողանալով Սերժ Սարգսյանի համար ընդունելի դարձնել «Տաշիրի» Կարեն Կարապետյանի թեկնածությունը:
Խորհրդարանական ընտրություններում Արա Բաբլոյանը ՀՀԿ համամասնական ցուցակի չորրորդ հանարն էր, ու չնայած բոլոր կանխատեսումներն ու ինֆորմացիոն արտահոսքերը նրան գործուղում էին Շվեյցարիա` այդ երկրում Հայաստանի արտակարգ և լիազոր դեսպանի պաշտոնին, ըստ ամենայնի` ի սկզբանե նա եղել է Սերժ Սարգսյանի «պահեստային» տարբերակներից մեկը հնարավոր կոմպրոմիսների պարագայում:
Եթե Սերժ Սարգսյանն, այնուամենայնիվ, գնացել է կոմպրոմիսի, ապա նա առայժմ չի ցանկանում համակարգի ներսում սրությամբ դնել իշխանության հարցը կամ բորբոքել 2018-ի թեման: Կամ Սերժ Սարգսյանը դեռ վերջնականապես չի կողմնորոշվել իր քաղաքական հեռանկարի հարցում, կամ էլ` կան այլ հրապարակային առիթներ, որոնք կբացահայտեն Սարգսյանի մտադրությունները: Առայժմ արձանագրենք, որ վաղն ունենալու ենք ԱԺ նոր նախագահ, ով գուցե պաշտոնավարի «անցումային» ռեժիմով` մինչև 2018-ի ապրիլ: