Գնահատելով կառավարության 7-8 ամիսների աշխատանքները և անդրադառնալով հարցին, թե արդյոք կառավարությունն անփոփոխ կազմով կարող է իր առջև դրված խնդիրները լուծել, տնտեսագետ Արտակ Մանուկյանը «Առաջին լրատվական»- ի հետ զրույցում նշեց, որ Հայաստանի տնտեսության առջև ծառացած մարտահրավերները համակարգային հիմնախնդիրներ են, և երբ որ դիտարկում ենք որևէ ռազմավարական լուծում, այդտեղ հաջողությունները միայն հայտարարություններով և օրենսդրական նախաձեռնություններով են չափվում, բայց ոչ կոնկրետ արդյունքներով:
«Հետևաբար, կարող ենք ասել, որ նախորդ կառավարության համեմատ որոշակի առումներով այստեղ կա արտադրողականության և արդյունավետության աճ, բայց դա բավարար չէ, որպեսզի ՀՀ-ն երկարատև և կայուն աճի փուլ թևակոխի, քանի որ համակարգային խնդիրները դեռևս մնում են չլուծված»,- նշեց տնտեսագետը: Նրա խոսքով՝ իրականացված կոնյուկտուրային փոփոխությունները, մեծ հաշվով, կոսմետիկ բնույթ են կրում:
Ա. Մանուկյանի դիտարկմամբ՝ չկա համալիր ուսումնասիրություն շատ բնագավառներում և որևէ ջանք չի գործադրվում ուսումնասիրելու գնագոյացման մեխանիզմները. «Այս պայմաններում խոսել մենաշնորհների դեմ արդյունավետ պայքարի մասին, դա ավելի շատ դեկլարատիվ բնույթի հայտարարություն կլինի, քան իրական թիրախ»:
Անդրադառնալով նախընտրական շրջանում 3,5 միլիարդի ներդրումների մասին վարչապետի խոստումներին, Ա. Մանուկյանը նշեց, որ այդ ներդրումային խոստումները հիմնված են հայկական ծագմամբ ռուսաստանցի ներդրողների խոստումների վրա, ինչը, ըստ տնտեսագետի, երկարաժամկետ հատվածում ռիսկային է: «Դրանք պայմանավորված են կոնկրետ անձով, ոչ թե տնտեսությունով, ինչը մտահոգիչ է: Մենք պետք է երկիրը գրավիչ դարձնենք բոլոր ներդրողների համար և ոչ թե կոնկրետ ոլորտներ որոշ անձանց համար»,- ընդգծեց Մանուկյանը:
Մանրամասները՝ տեսանյութում: