Եվրասիական տնտեսական միության (ԵԱՏՄ) նիստում օրեր առաջ որոշում է ընդունվել, որի համաձայն՝ միության անդամ երկրների մարզիկները չեն կարող համարվել լեգեոներներ: Հիշեցնենք, որ ԵԱՏՄ-ի անդամներ են Հայաստանը, Ռուսաստանը, Բելառուսը, Ղազախստանը և Ղրղըզստանը: Նիստում որոշում է կայացվել նաև, որ միության անդամ երկրներում մարզիկների նկատմամբ գործող սահմանափակումները պետք է վերացվեն: Հայաստանի բասկետբոլի ֆեդերացիան դեռևս 2016 թվականի հունիսին դիմել էր ՀՀ սպորտի և երիտասարդության հարցերի նախարարություն՝ նշելով, որ հայ բասկետբոլիստները լուրջ խոչընդոտների են հանդիպում Ռուսաստանի Դաշնությունում, որտեղ գործում են լեգեոներների սահմանափակումներ: Նախարարությունը ֆեդերացիայի դիմումի հիման վրա դիմել էր ԵԱՏՄ-ին:
Ընդունված նոր որոշման հեռանկարի շուրջ «Առաջին լրատվական»-ը զրուցեց Հայաստանի բասկետբոլի ֆեդերացիայի գլխավոր քարտուղար Արթուր Նազարյանի հետ:
– Պարոն Նազարյան, ինչպե՞ս կբնութագրեք ԵԱՏՄ-ի որոշումը լեգեոներ համարվող բասկետբոլիստների վերաբերյալ:
– Երկար սպասված որոշում էր, քանի որ Հայաստանի Հանրապետության անձնագիր ունեցող բասկետբոլիստները բազմաթիվ խնդիրների էին բախվում հատկապես Ռուսաստանում, ինչի մասին նախկինում բազմիցս խոսվել է: Նախորդ տարի, երբ բարձրացրինք այս հարցը և համապատասխան դիմումներ ներկայացրինք, գիտակցում էինք, որ խնդիրը 1-2 օրում չի կարող լուծվել, բայց ի վերջո պետք է հարթվի: Այս որոշումը նաև բարձրացնում է ԵԱՏՄ-ի հեղինակությունը՝ ցույց տալով, որ այն ձևական կառույց չէ… Ժամանակին նույն խնդիրները եղել են նաև Եվրամիությունում, բայց աստիճանաբար ամեն ինչ կարգավորվել է: Պարզապես անհրաժեշտ է, որ ազգային ֆեդերացիաները հետևողական լինեն և պաշտպանեն իրենց մարզիկների շահերը:
– Կարելի՞ է ասել, որ լեգեոներների սահմանափակման վերացումը կնպաստի Հայաստանի ազգային հավաքականի ուժեղացմանը:
– Անշուշտ, դա կնպաստի մեր հավաքականի ուժեղացմանը, սակայն սխալ կլինի ասել, թե մեր հույսը միայն սահմանափակման վերացումն է: Գլխավոր խնդիրն այն էր, որ շատերը պրոֆեսիոնալ կարիերայում արհեստական խնդիրների էին բախվում, չէին կարողանում ակումբներ գտնել այդ սահմանափակումների պատճառով: Այսօր ունենք նաև պատանի հայ բասկետբոլիստներ, որոնք չեն կարողանում Ռուսաստան տեղափոխվել այդ սահմանափակման պատճառով…
– Մեր երկրում քանի՞ բասկետբոլիստներ կան, որոնց խաղամակարդակը ներում է խաղալ Ռուսաստանում:
– Դա շատ բարդ հարց է, քանի որ Ռուսաստանը ունի բազմաթիվ լիգաներ… Ես կարող եմ ասել, որ 2016 թվականի դեկտեմբերի դրությամբ Հայաստանի քաղաքացիություն ունեցող 10 բասկետբոլիստ ակումբի խնդիր ուներ սահմանափակումների պատճառով: Նրանք հիմնականում Հայաստանի ազգային և երիտասարդական հավաքականների խաղացողներ էին: Այս տարվա ամռանը մենք 6 տարիքային հավաքական ենք ուղարկելու միջազգային ստուգատեսների, և այդ հավաքականներում շուրջ 16 թեկնածու կա Ռուսաստանից, այդ թվում՝ աղջիկներ…
– Ռուսական լիգաներում մինչ այս կայի՞ն բասկետբոլիստներ, ովքեր սահմանափակման պատճառով հրաժարվում էին խաղալ Հայաստանի հավաքականներում:
– Մեծամասնությունը համաձայնել էր, դրա համար էլ խնդիրների առաջ էին կանգնել: Կան մի քանի խաղացողներ, որոնք այս սահմանափակումների վերացումից հետո ևս կցանկանան միանալ հավաքականներին: Նրանց շարքում կառանձնացնեի Արտյոմ Յակովենկոյին, ով ազգությամբ հայ է: Յակովենկոն «Սախալին» ակումբի խաղացող է, նախկինում հաջողությամբ հանդես է եկել ՎՏԲ լիգայում: Ազգային հավաքականի գլխավոր մարզիչ Նիկշա Բավցևիչը մեծ ցանկություն ունի Արտյոմին տեսնել հավաքականում:
– Հայաստանի բասկետբոլի ֆեդերացիան առաջինը հանդես եկավ մեր հայաստանցի բասկետբոլիստների՝ ԵԱՏՄ-ի երկրներում լեգեոներ չհամարվելու միջնորդությամբ: Կարո՞ղ ենք ասել, որ ՀԲՖ-ի շնորհիվ սայլը տեղից շարժվեց:
– Պաշտոնապես այդպես է: 2-3 տարի է՝ շատերն էին դժգոհում սահմանափակումներից, սակայն պաշտոնապես ոչ ոք չէր զբաղվում: Նախորդ տարի մեր ֆեդերացիայի փոխնախագահ Արա Պողոսյանը Մոսկվայում շուրջ 1 ամիս հանդիպումներ ունեցավ այս հարցի շուրջ: Ավելի ուշ բելառուսները ևս միացան նախաձեռնությանը: Կարևորը, որ խնդիրը լուծում ստացավ… Պետք է նշել նաև, որ սպորտի նախարարությունը հետևողական աշխատանք կատարեց այս հարցում: