Մայիսի 16-ին ԱՄՆ Հայ դատի հանձնախումբը Վաշինգտոնում բողոքի ակցիա կիրականացնի՝ ընդդեմ Թուրքիայի նախագահ Ռեջեփ Թայիփ Էրդողանի, որն այցով գտնվում է Միացյալ Նահանգներում: Երթը կմեկնարկի տեղի ժամանակով 12:00-ին:
«Սա նախագահ Թրամփի հնարավորությունն է դեմ դուրս գալու Էրդողանին: Ժամանակն է մարտահրավեր նետել Էրդողանի սպառնալիքներին և թուրքական կառավարության քողարկված արշավին, որը միտված է ազդել ԱՄՆ քաղաքականության վրա օտարերկրյա գործակալներին, լոբբիստներին ու ազդեցություն ունեցող այլ անձանց տրվող խնդրահարույց վճարումների միջոցով: Նա կարող է առաջնահերթ համարել ամերիկյան սկզբունքները և մերժել ԱՄՆ կողմից Հայոց ցեղասպանության հիշատակմանն ուղղված Թուրքիայի արգելքը»,- ասվում է հայտարարության մեջ:
Նշենք նաև, որ Միացյալ Նահանգների Կոնգրեսի հանրապետական և դեմոկրատ 62 անդամ ստորագրել են նախագահ Դոնալդ Թրամփին ուղղված նամակը, որով հորդորում են նրան Սպիտակ տանը մայիսի 16-ին Էրդողանի հետ հանդիպման ժամանակ առաջնային համարել ժողովրդավարությունն ու մարդու իրավունքները: Հիշեցնելով Թուրքիայում մարդու իրավունքների և ժողովրդավարական արժեքների շարունակվող անկումները՝ երկկուսակցական խումբը կոչ է արել նախագահ Թրամփին «լինել անկեղծ և հետևողական ժողովրդավարական արժեքների ու մարդու իրավունքների աջակցության հարցում»: