Բիշքեկի դատարանը Ղրղըզստանի նախկին նախագահի որդուն՝ Մաքսիմ Բաքիևին, հեռակա կարգով դատապարտել է ցմահ ազատազրկման՝ կոռուպցիայի և հանցավոր ճանապարհով ստացված փողերի լվացման համար: Այս մասին հաղորդում է Interfax-ը:
Ղրղըզստանի գերագույն դատարանի մամուլի ծառայության փոխանցմամբ՝ դատարանը Բաքիևի և նրա բիզնես գործընկեր Վալերի Բելոկոնի դեմ քրեական գործը քննել է դատական բաց նիստում: Բաքիևը դատապարտվել է ցմահ ազատազրկման, բացի այդ դատարանը վճռել է բռնագրավել նրան պատկանող գույքը: Այսպիսով՝ դատարանն ուժի մեջ է թողել 2016թ. դատավճիռը:
2010թ. ապրիլի հեղափոխությունից հետո, ինչի արդյունքում Ղրղըզստանում իշխանափոխություն տեղի ունեցավ, նախագահ Կուրմանբեկ Բաքիևը, նրա ընտանիքի անդամները, համախոհները փախել են երկրից: Նախագահին, նրա ընտանիքին պատկանող ունեցվածքն ազգայնացվել է: Մաքսիմ Բաքիևի դեմ միջազգային հետախուզում է հայտարարված, ներկայում նա բնակվում է Լոնդոնում: