Անցած գիշեր Իրանի և Թուրքմենստանի սահմանի մոտ տեղի ունեցած 5.8 բալ ուժգնությամբ երկրաշարժի հետևանքով տուժել է իրանական հյուսիսարևելյան Խորասան Ռեզավի նահանգի մոտ 100 բնակավայր։ Ավելի քան 10 գյուղեր ավերվել են 60-70%-ով։ Այս մասին հայտնում է IRINN հեռուստաալիքը։
Արտակարգ իրավիճակների նահանգային վարչության ղեկավար Հուսեյնի Ազիմիի տվյալներով՝ տարերային աղետի զոհն է դարձել 3 մարդ, առնվազն 400 մարդ տուժել է։ Հոսպիտալացվել է 177 մարդ, որից 26-ի վիճակը ծանր է։
11 գյուղերում գազաբաշխումը խաթարված է, էլեկտրամատակարարումը ներկայում լիովին վերականգնվել է։ Մի շարք լեռնային շրջաններում երկրաշարժին հաջորդել են սողանքներն ու քարաթափումները, ինչի հետևանքով արգելափակվել է տեղական նշանակության 12 ճանապարհ։