Ադրբեջանի Սաբաիլի շրջանային դատարանը քննել է երկրի Տրանսպորտի, կապի և բարձր տեխնոլոգիաների նախարարության հայցը, որը պահանջել է արգելափակել ադրբեջանական ընդդիմադիր պարբերականների և «Ազատություն» ռադիոկայանի կայքերը:
Ինչպես հաղորդում են ադրբեջանական ԶԼՄ-ները, դատարանը վճռել է բավարարել հայցը: Վճռի հիման վրա կարգելափակվեն «Թուրան» հեռուստաալիքի, «Մեյդան TV» մեդիառեսուրսի, «Ազադլիգ» («Ազատություն») ռադիոկայանի կայքերը:
Ադրբեջանական գերատեսչության հայցի համաձայն՝ վերոնշյալ կայքերը իբրև թե տարածում են նյութեր, որոնք երկրի սահմանադրական կարգը բռնի կերպով փոխելու, կրոնական խմբավորումներին սատարելու կոչեր են պարունակում:
Ադրբեջանի իշխանությունները հետևողականորեն լռեցնում են երկրում անկախ մամուլի ձայնը` փորձելով բնակչությանը զրկել իրական տեղեկատվություն ստանալու հնարավորությունից: