ԱՄՆ ազգային հետախուզության ղեկավար Դեն Քոութսը հանդես է եկել ընթացիկ տարում Աֆղանստանում իրավիճակի զարգացման հոռետեսական գնահատականով։
«Աֆղանստանում քաղաքական դրությունն ու իրավիճակն անվտանգության ոլորտում հավանաբար կվատթարանան մինչ 2018 թվականը, նույնիսկ չնայած ԱՄՆ-ի և նրա դաշնակիցների ռազմական օգնության փոքր-ինչ մեծացմանը»,-հայտարարել է նա ԱՄՆ Սենատի հետախուզական հարցերով կոմիտեի լսումներում՝ փոխանցում է Interfax-ը։
Քոութսը պարզաբանել է, որ աֆղանկան «Թալիբան» շարժումը մեծ հավանակությամբ կշարունակի հաջողությունների հասնել, հատկապես գյուղական շրջաններում, իսկ աֆղանական անվտանգության ուժերի գործողությունները, ըստ ամենայնի, կթուլանան թալիբների գործողությունների, մարտական կորուստների, դասալքության, թույլ ղեկավարության պատճառով։
Ռազմական հետախուզության ղեկավար, գեներալ-լեյտենանտ Վինսենթ Ստյուարտն աջակցել է Քոութսին՝ նշելով, որ իրավիճակն Աֆղանստանում անկանխատեսելի է, ՆԱՏՕ-ի ուժերը կարող են կորցնել այն աննշան նվաճումները, որոնց հասել են ներկայության 16 տարիներին։