Հաղթանակի օրը Սուշի-բարը ռոլ է առաջարկում սև և կարմիր ձկնկիթով, խանութներում վաճառվում են փուչիկներ, թեյի բաժակներ, մարզաշապիկներ՝ ամեն ինչ նարնջագույն և սև գույների մեջ՝ գրում է The Washington Post թերթը:
Նարնջագույնը և սևը խորհրդային մարտական պարգևի գույներն են, իսկ այժմ դարձել են ռուսական հայրենասիրության խորհրդանիշ: Խորհրդային Միությունը Երկրորդ աշխարհամարտի տարիներին կորցրել է ավելի քան 20 միլիոն մարդ: Բայց մարդկանց նարնջագույնի և սևի շուրջ համախմբելու գաղափարը վերևներից է գալիս՝ գրում է թերթը:
«Երկրորդ աշխարհամարտում Խորհրդային Միության հաղթանակը, որտեղ այն կոչում են Հայրենական Մեծ պատերազմ, կենտրոնական տեղ է զբաղեցնում Վլադիմիր Պուտինի համար, որը փորձում է իր ռեժիմը ներկայացնել որպես տրամաբանական արդյունք երկրի պատմության մեջ»,- գրում է հոդվածագիրը:
Կրեմլի կարծիքով՝ աշխարհին ֆաշիզմից փրկելը Խորհրդային Միության միակ գերագույն ձեռքբերումը չէր. այն նաև հիմք հանդիսացավ, որպեսզի Ռուսաստանը սառը պատերազմից հետո վերադառնա որպես խոշոր գերտերություն, որը վերականգնել է Պուտինը: Այդ ամենն ընդգծում են միջուկային հրթիռները, տանկերը և սպառազինության մյուս տեսակները, որոնք երեքշաբթի առավոտյան կանցնեն Կարմիր հրապարակով:
Պատերազմը Պուտինի ռեժիմի օրինականացման միջոցներից մեկն է. նա իրեն հռչակել է հաղթանակի ժառանգ, ինչը սուրբ է բոլոր ռուսների համար, ուստի կառավարությունը քննադատություններից վեր է՝ մեկնաբանում է Մոսկվայի Կարնեգի կենտրոնի աշխատակից Անդրեյ Կոլեսնիկովը: «Եթե դուք քննադատում եք կառավարությանը, քննադատում եք Ռուսաստանին»,- ասել է վերլուծաբանը:
Այն, որ արտաքին աշխարհում ոմանք Սիրիայում տեղի ունեցող իրադարձությունները, Ղրիմի բռնազավթումը, Արևելյան Ուկրաինայում միջամտությունը կարող են կոչել ռուսական արկածախնդրություն, Կրեմլը և վերջինիս ենթակա ԶԼՄ-ները այս ամենը ներկայացնում են որպես աշխարհը քաոսից և ֆաշիզմից փրկելու Ռուսաստանի ջանքեր: Այս տեսանկյունից Ռուսաստանին քննադատելը հավասարվում է աշխարհը չարից փրկելու համար Խորհրդային Միությանը քննադատելուն:
Հաղթանակի օրվա հայրենասիրական առևտրականացման մեկ այլ նշանն էլ պատերազմի վետերան հանդիսացող նախնիների նկարները սև և նարնջագույն գույների մեջ պատվիրելու հնարավորությունն է՝ «Անմահ գունդ» երթին մասնակցելու համար, որն ի սկզբանե ներքևների նախաձեռնությունն էր:
Սակայն այս միջոցառումը ևս յուրացվել է պուտինյան կառավարության կողմից, և զանգվածային երթերը դարձել են պետական տոնակատարությունների մի մաս, ինչպես տանկերը, միջուկային հրթիռները: Այժմ դա ևս դարձել է պարտադիր, վերևից եկող հրահանգ՝ կարծում է Կոլեսնիկովը: