ԱՄՆ նախագահ Դոնալդ Թրամփի խորհրդականները պատրաստել են առաջարկներ՝ ուղղված Աֆղանստանում ամերիկյան ռազմավարության փոփոխմանը։ Դրանք իրենց մեջ ներառում են զորակազմի ընդլայնում, ինչպես նաև ՊՆ լիազորությունների ընդլայնում։ Այս մասին հայտնում է The Washington Post-ը՝ հղում անելով իր աղբյուրներին։
«Պլանը նախատեսում է ԱՄՆ զինծառայողների թվի ընդլայնում առնվազն 3000 զինվորով՝ ի հավելում ներկայիս 8400-ի»,-ասվում է տեքստում։ Դրանից բացի, նախատեսվում է Պենտագոնին, այլ ոչ թե Սպիտակ տանը լիազորել իրավունքով՝ որոշելու երկրում գտնվող ամերիկացի զինվորականների թիվը։ Նախարարությունը նաև կստանա ավելի լայն լիազորություններ՝ ուղղված «Թալիբան» շարժման գրոհայինների դեմ ավիացիայի կիրառմանը։ Թրամփի օգնականները խորհուրդ են տալիս չեղարկել նախկին վարչակազմի կողմից ներմուծված սահմանափակումները՝ Աֆղանստանի մարտական գոտիներում ամերիկացի խորհրդականների գործողությունների նկատմամբ։
Թրամփը դեռևս հավանություն չի տվել այդ նոր ռազմավարությանը։ Սպասվում է, որ պետության ղեկավարը վերջնական որոշումը կընդունի մինչ ՆԱՏՕ-ի գագաթնաժողովը, որը կանցկացվի Բրյուսելում մայիսի 25-ին։ Հավանության դեպքում Աֆղանստանում ԱՄՆ ռազմական ծախսերը կմեծանան։ Այժմ այդ երկրում արշավը Վաշինգտոնին տարեկան արժենում է 23 մլրդ դոլար։
Այդ պլանի հեղինակը, ըստ պարբերականի աղբյուրների, ազգային անվտանգության հարցերով նախագահի օգնական Հերբերտ Մակմաստերն է։