Լեռնային Ղարաբաղը թեկուզև չճանաչված, բայց երկիր է, այլ ոչ հակամարտություն, և մինչև տեղի չունենա այդ փաստի լիակատար գիտակցում, կարգավորում չի լինի:Այս մասին Interfax գործակալությանը տված հարցազրույցում ասել է ՀՀ պաշտպանության նախարար Վիգեն Սարգսյանը:
Նախարարը հիշեցրել է, որ Մոսկվայում տեղի ունեցած համաժողովի ժամանակ իր ելույթում նա հայտարարել է, որ խորապես վստահ է, որ այսօր ինչպես տարածաշրջանում, այնպես էլ ընդհանուր առմամբ աշխարհում գոյություն ունեցող հակամարտությունները չունեն ռազմական լուծում: «Միակ գործոնը, որը հայտնվում է ուժի կիառման արդյունքում, այս կամ այն կողմի վրա ճնշում գործադրելն է՝ բանակցային գործընթացում ավելի մեծ ճկունություն ցուցաբերելու համար: Արդյունքում միևնույն է պետք է լինեն բանակցություններ, միևնույն է պետք է լինի խաղաղություն, պետք է լինի խաղաղ համաձայնագիր: Եվ որքան ավելի խորը փակուղի է մտնում հակամարտությունը, ատելությունը, ագրեսիան, այնքան ավելի է է դժվարանում լուծել նման հակամարտությունը»,-ասել է նա:
ՎԻգեն Սարգսյանը ևս մեկ անգամ շեշտել է, որ արցախյան հակամարտությունը ռազմական լուծում չունի: «Մենք հույս ունենք, որ դա հասկանում են նաև Ադրբեջանում: Մենք հույս ունենք, որ Բաքվում որոշումների կայացման պատասխանատու մարդիկ գիտակցում են, որ շատ հեշտ է բացել քաոսի և լայնածավալ ռազմական գործողությունների, ամբողջ տարածաշրջանում էսկալացիայի դռները: Դա անպայմանորեն կուժեղացնի տարածաշրջանում ահաբեկչական խմբերի դերը, կաճի նաև արտաքին խաղացողների դերը, որոնք կսկսեն դրանից օգտվել»,- ասել է Վիգեն Սարգսյանը:
ՀՀ պաշտպանության նախարարը շեշտել է, որ Լեռնային Ղարաբաղը թեկուզև չճանաչված, բայց երկիր է, ոչ թե հակամարտություն և քանի դեռ տեղի չի ունեցել այս փաստի լիակատար գիտակցում, կարգավորում չի լինի: «Այնտեղ արդեն մեկ քառորդ դար դե ֆակտո անկախության պայմաններում իրական մարդիկ են ապրում: Նրանք պատասխանատու են իրենց որոշումների կայացման համար, նրանք ժողովրդավարական սկզբունքների, ազատ ընտրությունների հիման վրա ձևավորում են իրենց կառավարությունը, տեղի է ունենում բազմախմբակցական խորհրդարանի ձևավորում»,-հավելել է Վիգեն Սարգսյանը: