Պակիստանի Բելուջիստան նահանգի սահմանային կորպուսի պետ Նադիմ Ահմեդը հայտարարել է, որ Աֆղանստանի հետ սահմանին տեղի ունեցած փոխհրաձգության հետևանքով զոհվել են 50 աֆղան զինծառայողներ, 100-ը ստացել են վնասվածքներ։ Ոչնչացվել է սահմանային 5 անցակետ։
Պակիստանի բանակը մայիսի 5-ին մեղադրել էր աֆղան սահմանապահներին իրենց տարածքը գնդակոծելու մեջ։ Պակիստանյան կողմը կրել է 12 զոհ, կա 40 վիրավոր։ Աֆղան սահմանապահներն օրեր առաջ կրակ էին բացել Պակիստանի սահմանային կորպուսի ծառայողների ուղղությամբ, ովքեր պահպանել էին սահմանային բնակավայրերի բնակիչների մարդահամար անցկացնող խմբի անվտանգությունը։
Գեներալ-լեյտենանտ Ահմեդը կիրակի կայացած ճեպազրույցում պատմել է, որ աֆղան զինվորականները նույն օրը մտել են Պակիստան և տներ օկուպացրել՝ դիրքեր զբաղեցնելու և հարձակում սկսելու համար։ Իրենց հերթին պակիստանյան ուժերը հարձակվել են աֆղանական հսկիչ անցակետերի վրա՝ սպանելով 50, վիրավորելով 100 մարդու։
