Գերմանիայի կանցլեր Անգելա Մերկելի հետ սառը հանդիպումից մեկ օր անց Ռուսաստանի նախագահ Պուտինը Սոչիի իր նստավայրում ընդունեց հյուրի, որին ավելի ուրախ էր տեսնել: Թուրքիայի նախագահ Ռեջեփ Թայիփ Էրդողանից Պուտինը քննադատություններ չի լսի՝ գրում է Die Welt գերմանական պարբերականը:
«Պուտինն էլ իր հերթին չի քննադատի Թուրքիայում իրավական պետության ոչնչացումը»,- գրում է հոդվածագիրը՝ ուշադրություն հրավիրելով այն փաստի վրա, որ Ռուսաստանի նախագահը հանդիպման հենց սկզբում շնորհավորել է թուրք գործընկերոջը սահմանադրական փոփոխությունների հարցով հանրաքվեի արդյունքների կապակցությամբ:
Երկու ավտոկրատ պետությունների միջև հակամարտությունը, որը ծագել էր թուրք-սիրիական սահմանին ռուսական ռազմական ինքնաթիռի խոցումից հետո 2015թ., լուծվեց նույնքան արագ, որքան առաջացել էր: Թուրքիայում 2016թ. ամռանը պետական հեղաշրջման փորձը, դրան հետևած Էրդողանի կոշտ արձագանքը մտերմացրեց երկու նախագահներին՝ ասվում է հոդվածում:
Ավտորիտար կուրսը, որը վերցրել է թուրք նախագահը, բխում է նրա ռուս գործընկերոջ շահերից, որի «սուվերեն ժողովրդավարության» մոդելը նախատեսում է ժողովրդավարական ինստիտուտների ձևական պահպանում: Որքան ուժեղանում է քննադատությունը Թուրքիայի հանդեպ Եվրամիության կողմից, այնքան նա ավելի սրտաբաց ընդունելության է արժանանում Ռուսաստանում:
Միևնույն ժամանակ Թուրքիայի և Ռուսաստանի շահերը շատ հարցերում չեն համընկնում: Դա ակնհայտ դարձավ սիրիական թեման քննարկելիս: Այն դեպքում, երբ Թուրքիան պաշտպանում է սիրիական ընդդիմությանը, Ռուսաստանը շարունակում է աջակցել բռնապետ Ասադին: Մոսկվան և Անկարան տարբեր շահեր են հետապնդում նաև Սիրիայի հյուսիսում: Սոչիում Էրդողանը մատնանշեց, որ քուրդ մարտիկները նույն շարքում են գտնվում ահաբեկչական կազմակերպությունների հետ: Իսկ Ռուսաստանը վերջին ժամանակներս զարգացնում է հարաբերությունները սիրիացի քրդերի հետ՝ ասվում է հոդվածում:
