Ներկայում մեծ ժողովրդականություն են վայելում զարթուցիչները, որոնք նմանակում են արևածագ՝ քնած մարդուն աստիճանաբար արթնացնելու համար։ Լոս Անջելեսից Mode Modern ստարտափը վերցրել է այդ գաղափարը և օգտագործել այն բարձրում՝ հավելելով մի քանի առանձնահատուկ գործառույթներ։ Այս մասին հայտնում է telegraf.com.ua-ն։
«Խելացի» բարձը ստացել է Sunrise Smart Pillow անվանումը։ Այն հանդերձված է լուսադիոդներով, քնին հետևող համակարգով, դինամիկներով ու սմարթֆոնի հետ կապի անլար համակարգով։ Օգտատերերը կարող են արթնանալու համար ժամ գրանցել սմարթֆոնի համար նախատեսված հավելվածով, իսկ բարձն ինքնուրույն կսկսի արթնացնել մարդուն լույսի օգնությամբ։
Քնի ժամանակ բարձում առկա հատուկ ցուցիչները վերլուծում են օգտատիրոջ բոլոր շարժումները՝ որոշելու համար, թե քնի որ փուլում է նա գտնվում։ Լուսադիոդները սկսում են վառվել, երբ բարձը գրանցում է անցում արագ քնի փուլին, ինչն արթնանալը դարձնում է ավելի քիչ նյարդայնացնող։
Երբ արթնանալու ժամանակը մոտենում է, բարձը սկսում է երաժշտություն հնչեցնել։