ԱՄՆ-ը ՆԱՏՕ-ի անդամներին կստիպի վճարել իրենց բաժինը դաշինքի շրջանակներում հավաքական պաշտպանության ապահովման համար: Այս մասին հայտարարել է ԱՄՆ նախագահ Դոնալդ Թրամփը Փենսիլվանիա նահանգի Հարիսբերգ քաղաքում իր կառավարման 100 օրերին նվիրված ելույթի ժամանակ:
«Մենք ՆԱՏՕ-ի երկրներին ստիպում ենք կատարել իրենց պարտավորությունները»,- ասել է նա:
Նրա խոսքով՝ ՆԱՏՕ-ում Վաշինգտոնի դաշնակիցները «սկսել են միլիարդավոր դոլարներ վճարել»: Սակայն նա խոստացել է կանգ չառնել մինչև «բոլորը վճարեն այն, ինչ պարտք են»:
Թրամփը հիշեցրել է, որ «վերջին 8 տարում ԱՄՆ-ը կրկնապատկել է իր ռազմական ծախսերը»: Նրա խոսքով՝ ՆԱՏՕ-ի մյուս երկրները նույնը չեն արել: «Դա անազնիվ է»,- հայտարարել է ԱՄՆ նախագահը:
Նա նաև խոստացել է «վերականգնել ամերիկյան զինված ուժերը»:
«Ամերիկայի առաջնության պահպանումը ենթադրում է մեր զինված ուժերի վերականգնում: Եվ մենք սկսել ենք այդ գործընթացը»,- ասել է Թրամփը:
