«Նորընտիր Ազգային ժողովի առաջին նիստի օրը կառավարությունը մեխանիկորեն հրաժարական է տալիս»,- «Առաջին լրատվական»-ի հետ զրույցում ասաց սահմանադրագետ Վարդան Այվազյանը։
Նրա խոսքերով՝ անցումային դրույթները կարգավորվելու են նախորդ Սահմանադրությամբ։ «Երբ նախագահի լիազորությունները դադարեն 2018-ին, կառավարությունը նորից հրաժարական է տալու և նոր կառավարությունը ձևավորվելու է նոր սահմանադրական կարգավորումներով։ Այս մեկը նորից հին Սահմանադրությամբ է լինելու՝ նախագահը Ազգային ժողովի մեծամասնության համաձայնությամբ վարչապետ է նշանակելու, վարչապետն էլ՝ նախարարներին։ Ու 20 օրվա ընթացքում կառավարությունը ներկայացնելու է իր ծրագիրը»,- ասաց Վարդան Այվազյանը։
«ՀՀԿ-ի հետ քննարկումների արդյունքի հիման վրա՝ նախագահը կնշանակի վարչապետ, որը խորհրդարանը չի հաստատելու»,- ասաց Այվազյանը՝ հավելելով, որ եթե ծրագրին հավանություն չի տրվում՝ կառավարությունը հրաժարական է տալիս. «Կոնկրետ վարչապետի նշանակման հետ կապված նորընտիր խորհրդարանի անելիքը նրա մեծամասնության կարծիքն է։ Առանց դրա նախագահը վարչապետ նշանակել չի կարող։ Ընդհանրապես, աշխարհի բոլոր երկրներում է կառավարությունը ձևավորվում իշխանությունից ու մեծամասնությունից, ընդդիմությունն անելիք չունի։ Կարող է հետո ընդդիմությունը պարզապես կառավարության ծրագրին դեմ քվեարկի»։
Հետաքրքրվեցինք՝ արդյոք օրենքի բաց չէ այն հանգամանքը, որ մինչ այսօր մանդատների բաշխում է գնում, և, օրինակ, 500 քվե ստացած մարդը ըստ քաղաքական նպատակահարմարության ստանում է մանդատ՝ 1000 քվե ստացածի փոխարեն։ «Օրենքի բաց չկա, որովհետև կուսակցության ղեկավարությունն է որոշում։ Հիմա այն թեկնածուները, որոնք անցել են՝ ինքնաբացարկի դիմում են ներկայացնում։ Օրենքի խախտում կլիներ, եթե այդ մարդուն ծեծելով, սպառնալիքով ասեին՝ պետք է հրաժարվես։ Եթե այդ հրաժարվածներն ասեն, որ սպառնալիքի տակ են հրաժարվում՝ դա ուրիշ, իսկ հակառակ դեպքում օրենքի խախտում չկա»,- եզրափակեց նա։
Լուսանկարը՝ Photolure-ի
