Կենտրոն և Նորք-Մարաշ վարչական շրջանների ընդհանուր իրավասության դատարանում Արմեն Բեկթաշյանի նախագահությամբ ավարտվեց Գևորգ Ա.-ի գործի դատական քննությունը:
25-ամյա Գևորգին մեղադրանք էր առաջադրվել նախապատրաստվող ահաբեկչության մասին սուտ հաղորդում տալու համար՝ ՀՀ քրեական օրենսգրքի 259 հոդվածով: Որպես խափանման միջոց՝ ընտրվել էր կալանավորումը:
Ըստ մեղադրանքի՝Գևորգ Ա.-ն խանդել ու չի ցանկացել, որ իր ընկերուհի Ռ.-ն մասնակցի մորաքրոջ որդու հարսանիքին, որը տեղի էր ունենալու Ջրվեժի ռեստորաններից մեկում:
Գևորգը, «խանդի շարժառիթից դրդված ու գիտակցելով, որ իր կողմից տրված տեղեկությունը չի համապատասխանում իրականությանը», 2016 թվականի ապրիլի 16-ին, ժամը 17-ն անց 29-ին զանգահարել է ոստիկանության «1-02» հեռախոսահամարին ու սուտ հաղորդում է տվել, իբր՝ Կոտայքի մարզի Ջրվեժ գյուղում գտնվող «Վան» կամ «Անուշիկ» ռեստորանում պայթյուն է տեղի ունենալու:
Ամբաստանյալ Գևորգ Ա.-ն, խորհրդակցելով իր շահերի պաշտպանի հետ, միջնորդեց, որ գործը քննվի արագացված ընթացակարգով:
Առաջադրված մեղադրանքն ընդունելով հանդերձ՝ Գևորգն ասաց. «Ճիշտ է, իմ զանգը եղել ա, բայց ես ոչ ադեկվատ վիճակում եմ եղել… Ընդունում եմ, որ սխալ եմ արել…»:
Գևորգը նշեց նաև, որ ընկերուհուն նախապես չի սպառնացել , թե զանգելու է ոստիկանություն ու կեղծ ահազանգ տա՝ ռեստորանում նախապատրաստվող պայթյունի վերաբերյալ: Ընկերուհուն զանգել է ոստիկանություն զանգելուց հետո, ուղղակի տեղեկացրել է, թե ինչ է արել…
Մեղադրող դատախազը, որ մեղադրական եզրակացությունը հաստատելիս առարկել էր գործն արագացված ընթացակարգով քննելու դեմ, դատարանում փոխեց դիրքորոշումը ու համաձայնեց, որ գործը քննվի արագացված կարգով:
Դատարանը հրապարակեց ու հետազոտեց ամբաստանյալի անձը բնութագրող փաստաթղթերը: Գևորգ Ա.-ն նախկինում դատապարտված է եղել, 2 տարի ազատազրկում է կրել ու ազատություն է դուրս եկել 2014 թվականին:
Դատահոգեբուժական փորձաքննության եզրակացությամբ՝ հոգեկան որոշակի խնդիր ունեցող Գևորգ Ա.-ն ճանաչվել է սահմանափակ մեղսունակ:
Դատախազը հանդես եկավ մեղադրական ճառով ու միջնորդեց Գևորգ Ա.-ին մեղավոր ճանաչել ու դատապարտել 1 տարի 6 ամիս ազատազրկման:
Ամբաստանյալի շահերի պաշտպանը իր ճառում շեշտը դրեց Գևորգ Ա.-ի վատառողջության վրա, նշեց, որ նա կատարել է միջին ծանրության հանցավոր արարք, խնդրեց նրա նկատմամբ հնարավորինս մեղմ պատիժ սահմանել:
Ամբաստանյալ Գևորգ Ա.-ն ասաց. «Խղճով դատեք ինձ, ես հասկացել եմ, որ սխալ եմ արել»:
Հարցին՝ «Հասկացե՞լ ես, որ քո արարքի պատճառով մի հարսանիք ա հարամ էղել», ամբաստանյալ Գևորգ Ա.-ն պատասխանեց . «Հասկացել եմ: Նորմալ վիճակում որ լինեի, նման բան չէի անի»:
Դատարանը Գևորգ Ա.-ին մեղավոր ճանաչեց մեղսագրված արարքի համար՝ ՀՀ քրեական օրենսգրքի 259 հոդվածով, ու դատապարտեց 1 տարի ազատազրկման: