Միացյալ Նահանգների նախկին առաջին տիկին Միշել Օբաման բացատրել է, թե ինչու է դժգոհ հայացք ունեցել Դոնալդ Թրամփի երդմնակալության արարողության ժամանակ: Միշել Օբաման Օրլանդոյում Ճարտարապետության ամերիկյան համալսարանում հանդիպման ժամանակ հայտնել է, որ այդ պահին փորձել է զսպել արցունքները:
«Ես չէի ցանկանում, որ աչքերումս արցունքներ լինեն, քանի որ այդ ժամանակ մարդիկ կկարծեին, թե լաց եմ լինում նոր նախագահի համար»,- նշել է Միշել Օբաման:
Նրա խոսքով` իր մոտ զգացմունքների պոռթկում է եղել այն մտքից, որ հեռանալու է Սպիտակ տնից:
Նախկին առաջին տիկինը պատմել է, որ հիմա ընտանիքն ունի հնարավորություն գիշերը բացելու պատուհանը կամ ուղղակի ինչ-որ տեղ գնալու առանց ուղեկցության: Նա պարզաբանել է, որ քիչ ժամանակ է անցել, և իրենք դեռևս չեն սովորել նոր կյանքին: