Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ սկսվեց Էդգար Մանուկյանի գործի դատական քննությունը:
25-ամյա Էդգարը մեղադրվում է խմբի կազմում զենքի գործադրմամբ կատարած ավազակային հարձակման համար՝ ՀՀ քրեական օրենսգրքի 175 հոդվածի 3-րդ մասի 3-րդ կետով:
Ավազակային հարձակման գործով ամբաստանյալները երկուսը պետք է լինեին, Էդգարի կողքին կարող էր նստած լինել Հ. Ֆալանջյանը, սակայն հարձակման ընթացքում տուժողների կողմից ակտիվ դիմադրություն է ցույց տրվել, հարձակվողները վնասազերծվել են մինչև ոստիկանները դեպքի վայր կհասնեին:
Հ. Ֆալանջյանը ստացած բազմաթիվ վնասվածքներից տեղում մահացել է, իսկ Էդգար Մանուկյանի առողջությանը պատճառվել է ծանր վնաս:
Գործի նախաքննության ընթացքում քննվել են տուժողների կատարած գործողությունները, և նախաքննական մարմինը նրանց վերաբերյալ քրեական գործ չի հարուցել՝ եզրակացնելով, որ նրանք գործել են անհրաժեշտ պաշտպանության սահմաններում, կատարել են իրավաչափ գործողություններ՝ հանկարծակի ու վտանգավոր ոտնձգությունից պաշտպանելով իրենց և ընտանիքի անդամների կյանքն ու առողջությունը:
Ըստ մեղադրանքի՝ Էդգար Մանուկյանը նախնական համաձայնության է եկել իր հարևանի՝ ոստիկանության ծառայող Հ. Ֆալանջյանի հետ՝ գործարարի համբավ ունեցող Լևոն Ավետիսյանի ու նրա ընտանիքի անդամների գույքը ավազակությամբ հափշտակելու վերաբերյալ:
Էդգար Մանուկյանն ու Հ. Ֆալանջյանը, ըստ մեղադրանքի, զինվել են 9 մմ տրամաչափի ատրճանակով, փամփուշտներով, խլացուցիչով, դանակով, ինչպես նաև՝ փականներ բացելու համար նախատեսված պտուտակահանով, տուժողներին կապելու համար նախատեսված կպչուն ժապավենով, դիմակներով, լապտերներով, ձեռնոցներով:
2016 թվականի մայիսի 13-ին, գիշերվա ժամը 4-ի սահմաններում նրանք Հ. Ֆալանջյանին պատկանող «Մերսեդես Բենց» մեքենայով մեկնել են տուժողի թաղամաս՝ նախապես իրենց բջջային հեռախոսները թողնելով Էդգար Մանուկյանի վարած «Սամանդ» մեքենայի մեջ, որը կայանված էր Մանուկյանի բնակության վայրում:
Հասնելով տուժողների տան մերձակայքը, հանել են «Մերսեդեսի» հաշվառման համարանիշը, մեքենան կայանել են տուժողների տանը հարակից շենքերի բակում:
«Մերսեդեսը» գործի գցելու բանալին թողել են փականի մեջ, իսկ հեռակառավարման վահանակը՝ մեքենայի անվադողի վրա՝ դեպքի վայրից արագ հեռանալու նպատակով:
Այնուհետև, ըստ մեղադրանքի, Էդգար Մանուկյանն ու Հ. Ֆալանջյանը մոտեցել են տուժողների տանը, դարպասի վրայով մագլցել ու մուտք են գործել բակ: Հետո բաց պատուհանից մտել են տուն:
Նրանք դիմակավորված, խլացուցիչ ունեցող ատրճանակով և դանակով զինված, կյանքի և առողջության համար վտանգավոր բռնություն գործադրելու սպառնալիքով հարձակվել են ննջասենյակում քնած Լևոն Ավետիսյանի ու նրա կնոջ վրա, պահանջել են տանը եղած արժեքավոր գույքն ու գումարները հանձնել իրենց:
Հարձակվողները հանդիպել են ամուսինների ակտիվ դիմադրությանը, որը հաղթահարելու նպատակով, ըստ մեղադրանքի, Էդգար Մանուկյանն իր մոտ եղած դանակով հարվածներ է հասցրել Լևոն Ավեիսյանի մարմնի տարբեր մասերին՝ նրա առողջությանը պատճառելով ծանր վնաս:
Նույն ժամանակ, ըստ մեղադրանքի, Հ. Ֆալանջյանն իր մոտ եղած խլացուցիչով ատրճանակից կրակել է Լևոնի որովայնին՝ նրա առողջությանը պատճառելով ծանր վնաս:
Ստացած վնասվածքներն ու արյունահոսությունը, սակայն, չեն թուլացրել Լևոնի դիմադրությունը:
Հարևան ննջասենյակում մանկահասակ երեխաների հետ քնած էին Լևոնի դուստրն ու նրա ամուսին Սամվելը, երրորդ ննջասենյակում էր Լևոնի դեռահաս որդին՝ Դավիթը:
Աղմուկի ձայներից նրանք արթնացել ու շտապել են ծնողների ննջասենյակ և սկսել են համատեղ ուժերով պայքարել հարձակվողների դեմ՝ ջանալով վնասազերծել նրանց:
Վերջիններս չեն դադարեցրել հարձակումը, իրենց հերթին տուժողների նկատմամբ շարունակել են զենքերի գործադրումը: Ըստ մեղադրանքի՝ Էդգար Մանուկյանը անչափահաս Դավիթի դաստակին դանակով հարվածել, պատճառել է առողջության կարճատև քայքայումով թեթև վնաս:
Մանուկյանը դանակով հարվածել է նաև Սամվելի թիկունքային ու գոտկային հատվածներին՝ պատճառելով առողջության տևական քայքայումով միջին ծանրության վնաս:
Պայքարը ննջասենյակից տեղափոխվել է հյուրասենյակ, որտեղ Հ. Ֆալանջյանի դեմքը փակող դիմակը դուրս է եկել, դեմքը բացվել է: Լևոն Ավետիսյանը, լինելով ոստիկանության համակարգի նախկին աշխատող, ճանաչել է նրան՝ Ֆալանջյանը եղել է նրանց թաղամասի «օպերը»:
Ըստ մեղադրանքի՝ տեսնելով, որ տուժողներն իրեն ճանաչեցին, Ֆալանջյանը մտադրվել է հանցանքը թաքցնելու նպատակով սպանել նրանց: Այդ դիտավորությունը դուրս էր Էդգար Մանուկյանի ունեցած հանցավոր դիտավորությունից:
Ըստ մեղադրանքի՝ Հ. Ֆալանջյանը տեղում առաջացած սպանության դիտավորությամբ գործադրել է ատրճանակը, կրակել է անչափահաս Դավիթի ուղղությամբ՝ կրծքավանդակի շրջանում նրան պատճառելով միջանցիկ վնասվածք. գնդակը դուրս է եկել դեռահասի մարմնից ու դիպել է սենյակի պատին: Դավիթին պատճառվել է առողջության տևական քայքայումով միջին ծանրության վնաս:
Անչափահասի վրա արձակված կրակոցից հետո հարձակվողների ու տան բնակիչների միջև կենաց ու մահու կռիվ է ընթացել, որի ժամանակ հարձակվողները պարտվել են՝ Հ. Ֆալանջյանը գլխի ու մարմնի մյուս մասերում ստացած բազմաթիվ վնասվածքներից տեղում մահացել է, իսկ Էդգար Մանուկյանի առողջությանը պատճառվել է ծանր վնաս:
Տուժող Լևոն Ավետիսյանը մինչև օրս բուժվում է, նա դատարան էր եկել մարմնին միացված խողովակով, քայլում էր ձեռնափայտի օգնությամբ, դատական ամբողջ նիստի ընթացքում դատարանի թույլտվությամբ մնաց նստած:
Ըստ տուժող կողմի՝ հարձակման ընթացքին դռան հետևից հետևել են մանկահասակ երեխաները, բոլորը ծանր սթրես են տարել ու մինչ օրս ուշքի չեն եկել:
Գործով մեղադրող դատախազ Ռ. Երիցյանը դատարանում հրապարակեց մեղադրական եզրակացության եզրափակիչ մասը, նախագահող դատավորը ամբաստանյալ Էդգար Մանուկյանին բացատրեց՝ ինչ հոդվածով է նա մեղադրվում, ու նշեց, որ մեղսագրված արարքի համար օրենքով սահմանված է 8-15 տարի ազատազրկում:
Ամբաստանյալ Էդգար Մանուկյանը օգտվեց իր իրավունքից ու մեղադրանքն ընդունել-չընդունելու վերաբերյալ դիրքորոշում չհայտնեց:
Էդգարին նախաքննական մարմինը մեղադրանք էր առաջադրել նաև 2012 թվականի նոյեմբերին մեքենայի 4 անվադողեր հափշտակելու, մեքենատիրոջը 300 հազար դրամի գույքային վնաս պատճառելու համար՝ ՀՀ քրեական օրենսգրքի 177 հոդվածի 1-ին մասով:
Մինչև դատաքննությունը սկսվելը Էդգար Մանուկյանի շահերի պաշտպան, փաստաբան Կարեն Հակոբյանը միջնորդեց գողության մասով Էդգար Մանուկյանի քրեական հետապնդումը դադարեցնել՝ վաղեմության ժամկետն անցնելու հիմքով:
Կողմերը չառարկեցին:
Դատարանը բավարարեց միջնորդությունը, 4 ու կես տարի առաջ կատարված գողության մասով դադարեցրեց Էդգար Մանուկյանի քրեական հետապնդումը՝ վաղեմության ժամկետն անցնելու հիմքով:
Մինչև դատաքննությունը սկսվելը տուժող Լևոն Ավետիսյանի ներկայացուցիչ, փաստաբան Նվարդ Սվարյանը ներկայացրեց իր վստահորդի քաղհայցը, որը կազմում է շուրջ 4 միլիոն 700 հազար դրամ: Սա հիմնականում տուժող Լևոն Ավետիսյանի բուժման ծախսերի հանրագումարն է՝ ըստ տուժող կողմի:
Փաստաբան Նվարդ Սվարյանը միջնորդություն ներկայացրեց՝ քաղհայցի ապահովման միջոց՝ կալանք կիրառելու վերաբերյալ: Ըստ միջնորդության՝ խնդրվում էր կալանք կիրառել Հ. Ֆալանջյանին պատկանող «Մերսեդես Բենց» և Էդգար Մանուկյանի վարած «Սամանդ» մեքենաների վրա: Առաջին մեքենան նախաքննության ժամանակ արդեն իսկ արգելանքի տակ է վերցված:
Ինչ վերաբերում է «Սամանդ» ավտոմեքենային՝ Էդգար Մանուկյանի շահերի պաշտպան, փաստաբան Կարեն Հակոբյանը նշեց, որ այդ մեքենան պատկանում է Էդգարի քեռուն, այն երբեք հաշվառված ու գրանցված չի եղել Էդգար Մանուկյանի անունով, այդ մասին ոստիկանությունից առկա է տեղեկանք: Փաստաբանը նշեց նաև, որ Էդգարի անունով ընդհանրապես որևէ գույք գոյություն չունի…
Դատարանը մերժեց տուժողի ներկայացուցիչ Նվարդ Սվարյանի միջնորդությունը՝ քաղհայցի ապահովման միջոց կիրառելու՝ հիշյալ մեքենաները կալանքի տակ առնելու վերաբերյալ:
Դատարանը սահմանեց ապացույցների հետազոտման հետևյալ կարգը՝ կհարցաքննվեն գործով տուժողները, վկաները, կհետազոտվեն գործում առկա փաստաթղթերն ու այլ ապացույցները, վերջում կհարցաքննվի ամբաստանյալ Էդգար Մանուկյանը:
Տուժողների հարցաքննությունը դատարանը կսկսի հաջորդ դատական նիստին՝ մայիսի 20-ին:
