Անգլիայի Պրեմիեր լիգայի 26-րդ տուրից հետաձգված մանչեսթերյան դերբին հիասթափեցրեց միլիոնավոր երկրպագուների: Թե «Յունայթեդի» և թե «Սիթիի» ֆանատները անհամբերությամբ էին սպասում կարևորագույն այս մրցավեճին՝ ակնկալելով լարված և դիտարժան ֆուտբոլ: Դեռևս առաջին կեսում պարզ դարձավ, որ «Յունայթեդի» համար առաջնայինը ոչ թե հաշվի մեջ առաջ անցնելն է, այլ գնդակ բաց չթողնելը: Ողջ հանդիպման ընթացքում «Յունայթեդին» չհաջողվեց ձեռնարկել գոլային գրոհ:
Մոուրինյոյի թիմը մրցակցի դարպասը գրավելու երկու հնարավորություն ունեցավ: Առաջին դեպքում «Սիթիի» դարպասապահի կոպիտ սխալից կարող էր օգտվել Հենրիխ Մխիթարյանը, իսկ երկրորդ դեպքում Անդեր Էրերան կարող էր հաշիվը բացել ստանդարտ դիրքի խաղարկման միջոցով: Մոուրինյոն, զրկված լինելով կիսապաշտպան Պոլ Պոգբայից, փորձել էր կենտրոնական գոտում խաղը կառուցել Կարիկի, Ֆելաինիի և Էրերայի միջոցով: Մասնավորապես, Կարիկը միայնակ գործում էր հենակետային կիսապաշտպանի դիրքում և չէր փորձում առաջ շարժվել: Էրերան ողջ հանդիպման ընթացքում փորձում էր կասեցնել մրցակցի առաջխաղացումները, իսկ Ֆելաինիի խաղն ուղղակի չէր ստացվում: Նա չէր կարողանում գնդակ պահել, իսկ փոխանցումների զգալի մասը հասցեատիրոջը չէր հասնում: Ուստի առջևի հատվածում գտնվող Մարսիալը, Ռեշֆորդն ու Մխիթարյանն ուղղակի կտրվել էին խաղից:
Չունենալով տակտիկական այլընտրանք՝ Մոուրինյոն ստիպված եղավ Մարսիալին, Մխիթարյանին և Ռեշֆորդին ետ քաշել և ստեղծել երկշերտ, նույնիսկ եռաշերտ պաշտպանություն: Նունիսկ այս մարտավարությամբ «Յունայթեդը» բավական թույլ և թափթփված խաղաց: Ունենալով Ագուերոյի և Դե Բրյունեի պես խաղացողներ՝ «Սիթին» այս մրցավեճում պետք է երեք միավոր վաստակեր, բայց… Խոսեպ Գվարդիոլան ոչ մի կերպ չի ցանկանում հրաժարվել իր կողմից ստեղծված բարսելոնյան խաղաոճից: «Բարսելոնայում» Գվարդիոլան տրամադրության տակ ուներ Մեսսիի, Ինյեստայի պես վարպետների, ովքեր իրենց վրա էին վերցնում խաղը և բեկում հանդիպման ընթացը: Ներկայիս «Սիթիին» շատերը անվանում են «դախացած» «Բարսելոնա»:
Մանր փոխանցումներով և գնդակ պահելով՝ չափազանց դժվար է արդյունքի հասնելը: 90 րոպեների ընթացքում Գվարդիոլան հանդիպման ընթացքը փոխելու փորձ չկատարեց՝ հույսը դնելով մրցակցի սխալների վրա: Ինչ խոսք, «Սիթիի» անհաջող խաղը նաև կիսապաշտպանության առաջատար Դավիդ Սիլվայի բացակայության հետևանք էր:
Ինչևէ, «Յունայթեդի» շատ երկրպագուներ կարծում են, որ եթե առաջին կեսում Մխիթարյանը գրավեր «Սիթիի» դարպասը, ապա Մոուրինյոյի թիմը կպահպաներ նվազագույն առավելությունը և երեք միավոր կվաստակեր: Նշենք, որ տվյալ դրվագում Մխիթարյանի համար բավական դժվար էր գոլի հեղինակ դառնալը: Ինչ խոսք, մեր ֆուտբոլիստը կարող էր ավելի հաջող հարվածել, բայց եթե պահին օբյեկտիվորեն մոտենանք, ապա պետք է ընդունենք, որ Մխիթարյանի պես վարպետների պարագայում այդ դիրքից գոլ խփելու հավանականությունը 50/50 էր:
Ինչ վերաբերում է գոլի դեպքում «Յունայթեդի» հաղթելուն, ապա համաձայնեք, որ 0:1 հաշվի դեպքում «Սիթին» կանցներ հախուռն գրոհների՝ ստիպելով խաղալ բաց ֆուտբոլ: Ի տարբերություն «Սիթիի»՝ այս խաղում «Յունայթեդը» չուներ, այսպես ասած, ռմբարկուական հատկանիշներով օժտված ֆուտբոլիստներ: Բաց ֆուտբոլի դեպքում, կարծում ենք, «Սիթիի» հաջողության հասնելու հավանականությունը շատ ավելի մեծ կլիներ:
Այս պահին «Յունայթեդը» 64 միավորով շարունակում է մնալ 5-րդ հորիզոնականում: 4-րդ տեղում գտնվող «Սիթին» ունի 65 միավոր, իսկ լավագույն եռյակը եզրափակող «Լիվերպուլը»՝ 66: Նշենք, սակայն, որ «Լիվերպուլը», ի տարբերություն «Յունայթեդի» և «Սիթիի», մեկ հանդիպում ավելի է անցկացրել:
Ընդամենը երկու օր անց «Յունայթեդը» Պրեմիեր լիգայի շրջանակներում սեփական հարկի տակ կմրցի «Սունսիի» հետ: Մայիսի 4-ին էլ Մոուրինյոյի թիմը Եվրոպայի լիգայի խաղարկության կիսաեզրափակչի առաջին հանդիպումը կանցկացնի՝ հյուրընկալելով իսպանական «Սելտային»:
