Քիչ առաջ իր գրասենյակում ՀՀ Փաստաբանական դպրոցի տնօրեն Սիմոն Բաբայանի, ՀՀ փաստաբանների պալատի նախագահի խորհրդական Գևորգ Մկրտչյանի, ՀՀ փաստաբանների պալատի նախագահի արտաքին հարաբերությունների գծով խորհրդական Վրեժ Խաչիկյանի և ևս մեկ անձի կողմից Տիգրան Աթանեսյանի գրասենյակում հարձակման են ենթարկվել փաստաբաններ Տիգրան Աթանեսյանն ու Արմեն Սողոմոնյանը։ Փաստաբաններն ունեն մարմնական վնասվածքներ։
Տիգրան Աթանեսյանը «Առաջին լրատվական»-ի հետ զրույցում ասաց, որ իր վնասվածքները թեթև են, իսկ Արմեն Սողոմոնյանը բավական լուրջ վնասվածքներ ունի՝ հասցված կտրող-ծակող գործիքով:
Ներկա պահին փաստաբանի գրասենյակում ոստիկանությունն է աշխատում:
Նշենք, որ Փաստաբաննեի պալատի գործունեության հետ կապված փաստաբանների այս խմբերը տարաձայնությունենր ունեն, Պալատը, Պալատի նախագահը մշտապես կարգապահական վարույթներով հետապնդում են իրենց գործունեությունը չկիսող փաստաբաններին:
Տիգրան Աթանեսյանը մեզ հետ զրույցում ասաց, որ այս վիճաբանությունը նույն թեմայով է եղել: «Վեճը եղել է Պալատի հետ կապված տարաձայնությունների պատճառով: Իրենք ներխուժել են իմ գրասենյակ և հարձակվել են ինձ վրա, փորձել են դուրս հանել իմ աշխատողին: Անակնկալի եկանք, բայց փորձեցիքն դիմադրել, և հիմա դեպքի վայրում ոստիկաններ են աշխատում»,- ասաց Աթանեսյանը:
Փաստաբանի խոսքով՝ թեև իրենք ունեն մարմնական վնասվածքներ, բայց այդպիսով իրենց հաջողվեց բացահայտել Պալատի և Պալատի անունից հանդես եկող փաստաբանների իրական դեմքը, այն, որ փաստաբանը կարող է ինչ-որ կտրող գործիքով հարձակվել մեկ այլ փաստաբանի վրա, վնասվածքներ պատճառել:
«Թեկուզ մենք ֆիզիկական վնասվածքներ ունենք, բայց ես ուրախ եմ, որ բացահայտվեց նրանց իրական դեմքը: Սրիկաների դիմակը պատռվեց»,- ասաց Աթանեսյանը՝ հավելելով, որ ինքը վստահ է՝ իրենց վրա հարձակումը եղել է Փաստաբանների պալատի նախագահ Արա Զոհրաբյանի հրահանգով: «Ես վստահ եմ, որ նրա հրահանգով է, քանի որ նրանք անգամ զուգարան չեն գնում առանց պալատի նախագահի հրահանգի»,- եզրափակեց Աթանեսյանը:
Հարձակում գործած փաստաբաններից ոչ ոք չպատասխանեց մեր հեռախոսազանգերին:
