Թուրք պատմաբան Թաներ Աքչամը, որն առաջին թուրք գիտնականներից մեկն է, որ ճանաչել է Հայոց Ցեղասպանությունը, հայերի կոտորածի վերաբերյալ նոր արխիվային փաստաթղթեր է հրապարակել: Այս մասին հաղորդում է «Ակօս» պարբերականը:
Թաներ Աքչամը ներկայացրել է հեռագիր, որը 1915թ. հուլիսի 4-ին ուղարկվել է Խարբերդի նահանգապետին, վերջինս այն պետք է փոխանցեր Նազիմ բեյին: Հեռագիրը տեղեկություններ է խնդրում այդ տարածքից տեղահանվող հայերի մասին: «Այդ վնասակար տարրերը միայն տեղահանվո՞ւմ են, թե՞ նաև ոչնչացվում, խնդրում ենք բացահայտորեն տեղեկացրեք մեզ, եղբայր», – ասվում է Բեհաեդդին Շաքիրի կողմից գրված նամակում:
Հեռագրի վրա դրված է հատուկ կնիք, որը հաստատում է փաստաթղթի իսկությունը:
Ավելի վաղ Աքչամը հայտարարել էր, որ Հայոց ցեղասպանության վերաբերյալ արժեքավոր փաստաթղթեր է հայտնաբերել Երուսաղեմի հայոց պատրիարքարանում:
