Ավարտվում է ԵԿՄ Մալաթիա-Սեբաստիա տարածքային կառույցի նախկին ղեկավարներ, եղբայրներ Սեդրակ և Անդրանիկ Զատիկյանների սպանությունները ծրագրած խմբից 5-րդ ամբաստանյալի՝ Նարեկ Խաչատրյանի դատավարությունը:
Հիշեցնենք, որ 4 անձ՝ սպանության պատվիրատուներից մեկը, կատարողը և օժանդակողներն արդեն դատապարտվել են 2006թ-ին կատարված սպանության գործով:
Ս. Զատիկյանի սպանության երկրորդ պատվիրատու լինելու մեջ մեղադրվող Նարեկ Խաչատրյանը 9 տարի փախուստի մեջ գտնվելուց և վերջապես հայտնաբերվելուց հետո այժմ փորձում է ազատվել պատժի կրումից կամ գոնե թեթև պատիժ ստանալ:
Այդ նպատակով, ապրիլի 25-ին, հիվանդությունների վերաբերյալ գրառումներով հին թղթերի հետ միասին նա մի նոր թուղթ էր բերել դատարան, որը հաստատված էր «Նուբարաշեն» ՔԿՀ պետ Սերոբ Հարությունյանի ստորագրությամբ: Մինչ այս թղթի կշռին ու բովանդակությանն անդրադառնալը նշենք, որ դատական նիստի ընթացքում պաշտպան Վարդուհի Էլբակյանը միջնորդեց ստացիոնար դատահոգեբուժական փորձաքննություն նշանակել իր պաշտպանյալ Նարեկ Խաչատրյանի նկատմամբ:
Ըստ պաշտպանի՝ նախկինում նշանակվել է նման փորձաքննություն, քանի որ Նարեկ Խաչատրյանը հաշվառված է եղել «Ավան» հոգեբուժական հիմնարկում՝ անձի շիզոյի խանգարում ախտորոշմամբ: 2003-ին անցել է զինվորական բժշկական փորձաքննություն «Նուբարաշենի» հոգեբուժական կլինիկայում, ստացել է տարկետում զինծառայությունից 3 տարի ժամկետով՝ մինչև 2006 թվականը: Հիմք ընդունելով վերոգրյալը՝ նախաքննական մարմինը նրա անմեղսունակության մասը որոշելու համար նշանակել է ամբուլատոր դատաբժշկական փորձաքննություն: Հանձնաժողովն ուսումնասիրել է Ն. Խաչատրյանի նյարդային և հոգեկան վիճակն ու հանգել եզրակացության. նա խրոնիկական հոգեկան հիվանդությամբ չի տառապել, չի տառապում, այլ հանդիսանում է փսիխոպատ անձնավորություն: Նա իրեն մեղսագրվող արարքը կատարելու ժամանակ, այնպես էլ ներկայումս կարող է իրեն հաշիվ տալ իր գործողությունների համար և ղեկավարել դրանք, ուստի Նարեկ Խաչատրյանին պետք է ճանաչել մեղսունակ:
Սակայն, ըստ պաշտպանի, 2015թ-ից՝ կալանավորումից հետո Նարեկ Խաչատրյանի վիճակն ավելի է վատացել, մշտապես գտնվում է «Նուբարաշեն» ՔԿՀ-ի բժիշկների հսկողության տակ:
25.03.2017թ-ին «Աստղիկ» բժշկական կենտրոնում նա ենթարկվել է հոգեբույժի կոնսուլտացիայի, զննել է նյարդաբանը. ամբաստանյալը գանգատվել է ձեռքի թմրածությունից, տագնապից, կարիք ունի հոգեբույժի կոնսուլտացիայի:
Հիվանդը, ըստ իր խոսքի՝ ունի ինքնավնասումներ բազուկների վրա, իրեն բնութագրում է որպես մեկուսի, դյուրագրգիռ անձ: Գանգատվում է նյարդայնությունից, գլխացավից, անքնությունից: Նշում է, որ անընդհատ երեխաների խաղի ձայներ է լսում, երեկոյան՝ իրեն կանչող ձայներ: Կասկածամիտ է: Ինտելեկտը համապատասխանում է ստացած կրթությանը:
Չի բացառվում Շիզոաֆեկտիվ փսիխոզի առկայություն…
Ըստ ՔԿՀ-ում առկա պատմագրի՝ նա հարցերին պատասխանում է ուշացումով, կասկածամիտ է: Խցում մեկուսացված է, անտարբեր է շրջապատի նկատմամբ, չի արտահայտում իր զգացմունքները, ծածկամիտ է, կասկածամիտ՝ շրջապատի նկատմամբ: Ինքնավնասման ու կպչուն մտքեր ունի…
Պաշտպանի խոսքով՝ այժմ իր պաշտպանյալի մոտ առկա է հետտրավմատիկ հիվանդություն, որը ներառված է կառավարության հաստատած՝ պատիժը կրելուն խոչընդոտող հիվանդությունների ցանկում, և որը կարող է հաստատվել կամ հերքվել դատահոգեբուժական կրկնակի փորձաքննության արդյունքում:
Փորձագետներին առաջարկում է պարզել՝ Ն. Խաչատրյանը տառապու՞մ է որևէ հոգեկան հիվանդությամբ, թե ՞ոչ, եթե՝ այո, ուրեմն՝ ինչպիսի՞ և երբվանի՞ց, այն ընդգրկվա՞ծ է կառավարության հաստատած հիվանդությունների ցանկում:
Դատարանը պահանջեց պատճեների փոխարեն ներկայացնել հիվանդությունների առկայությունը հավաստող փաստաթղթերի բնօրինակները: Չկար: Պարզվեց, որ դրանցից ամենաթարմը «Նուբարաշեն» ՔԿՀ- այցելած և անտեղ ամբաստանյալին զննած, քննած մասնագետների կատարած գրություններն են՝ հաստատված ՔԿՀ-ի պետի ստորագրությամբ, ամբաստանյալի առողջական վիճակը հսկողներն էլ տեղի մասնագետ կոչվողներն են:
Նկատենք, որ շատ դեպքերում, երբ համակարգի կամակատարները նշում են անազատության մեջ գտնվողի լավ վիճակի մասին, մարդը հանկարծ մահանում է կամ վիճակը վատթարանում, իսկ երբ ասում են՝ շատ վատ է, լրիվ հակառակ պատկերն է պարզվում, ինչպես այս դեպքում:
Դատարանում դրսևորած ազատ պահվածքից, ուղեկցող գումարտակի անդամների հետ և նրանց ներկայությամբ անբռնազբոս շփումից, լրագրողին հասցեագրված սպառնալից տոնից ակներև է, որ նա ամենևին էլ մեկուսացված չէ, ծածկամիտ չէ, բայց կասկածամիտ ու ագրեսիվ է: Եթե մեկուսացված վիճակում ինքն իրեն է վնասում, ուրեմն ազատության մեջ կարող է վնաս տալ ուրիշներին. Օրինակ՝ նյարդայնանալ ու սպանության պատվեր տալ…
Ուրեմն արժե՞ մեղմ վերաբերվել, առավել ևս՝ բաց թողնել նրան. «Նուբարաշեն» ՔԿՀ-ի գրությունը լավագույն դեպքում արժանահավատ չէ, վատագույն դեպքում՝ ամբաստանյալին անազատության մեջ ավելի երկար պահելու ևս մեկ հիմք է:
Դատարանը հետաձգեց նիստը մեկ շաբաթով. Մայիսի 2-ին միջնորդության վերաբերյալ իրենց դիրքորոշումները կհայտնեն մեղադրողն ու տուժողի իրավահաջորդի ներկայացուցիչը:
