Շատերը քննադատում են, որ Երևանը դարձել է պճնամոլ քաղաք, սակայն խնդիրներն իրականում այդպես էլ լուծում չեն ստացել: «Առաջին լրատվական»- ի հետ զրույցում, անդրադառնալով հարցին, թե 4 տարի լինելով Երևանի անագանու անդամ՝ ինչպես է գնահատում Տարոն Մարգարյանի աշխատանքը, դերասան Հրանտ Թոխատյանը նշեց. «4 տարի լինելով ավագանու անդամ՝ ես որոշեցի դուրս գալ, քանի որ մտածեցի՝ ես երևի եղել եմ ավագանու վատ անդամ, երևի թե կարելի էր ավելին անել, ինչը չեմ արել սուբյեկտիվ և օբյեկտիվ պատճառներով: Կարծում եմ, որ կարող է իմ փոխարեն գալ ավելի լավ մարդ և զբաղվի դրանով: Իմ կարծիքով՝ ավագանու անդամները պետք է ավելի ակտիվ մասնակցեն մեր քաղաքաշինության հարցերին, ինչը ես չէի կարող թեկուզ հենց ժամանակի սղության պատճառով, չնայած ուզում էի:
Վերջին տարիներին մենք քաղաքապետներ փոխեցինք, մի փոքր հույս եկավ, երբ Կարեն Կարապետյանը փորձեց թարմ մտքեր բերել, բայց դա մնաց թղթի վրա, շատ կարճ տևեց: Ինչ վերաբերում է Տարոն Մարգարյանի գործունեությանը, փոփոխություններ եղել են հենց Տարոն Մարգարյանի քաղաքապետ եղած շրջանում: Կարելի է տալ գնահատական. եթե սանդղակը 1-ից 10-ը վերցնենք, գնահատականը կարող է տատանվել 7-8-ի միջև»:
Դերասանի խոսքով՝ մեր քաղաքի դեմքին այնքան կնճիռ է ավելացել, որ այսօր արդեն կոսմետիկ վիրահատություն է պետք մեր քաղաքին. «Ցավում եմ դրա համար: Մենք քանդեցինք Երևանի հին դեմքը, փոխարենը ավելացրեցինք սպիներ, որոնք առաջացրին այդ կնճիռները, այսօր պետք է հարթվեն այդ կնճիռները: Եվ կնճիռները հարթելու գործը նաև ավագանու ուսերին է»:
Թոխատյանի խոսքով՝ դարձել ենք ֆեյսբուքահայություն, և ով ավելի շատ հայհոյի իշխանությանը, նա ավելի հերոս է համարվում: «Ինչքա՞ն կարող ենք այդպես ապրել: Յոլա գնալն է մեզ սպանում, չի կարելի յոլա գնալ, ապրել է պետք»,- ընդգծեց դերասանը:
Հարցազրույցն ամբողջությամբ՝ տեսանյութում: