Ապրիլի 24-ին ԲՀԿ ղեկավար Գագիկ Ծառուկյանը լրագրողների հետ զրույցում անդրադառնալով ԱԺ գնացող պատգամավորների ցուցակին՝ ասել էր, որ ամեն ինչ իր հունով գնում է, իր թիմից ոչ մեկը սթրեսի մեջ չի, բոլորն էլ սպասում են իր որոշմանը. «Ամենակարևորը՝ իմ թիմն անհանգստացած չէ, բոլորն էլ գիտեն, բոլորն էլ իմ թիմակիցներն են, բոլորին էլ շատ հարգում եմ, բոլորից էլ շատ շնորհակալ եմ, բոլորն իրենց աշխատանքները կատարել են»:
Անդրադառնալով Նապոլեոն Ազիզյանի անվան շուրջ ստեղծված աղմուկին՝ Ծառուկյանը նկատել էր. «Նապոլեոն Ազիզյանը մեր հարգարժան գործընկերն է, առողջական խնդիրներ ունի, բուժման մեջ է, բայց ամեն ինչ լավ է, իր հարցազրույցները կարդացել եք, գիտեք»:
Հիշեցնենք, որ Նապոլեոն Ազիզյանը վերջերս մեզ հետ զրույցում անդրադառնալով մամուլում շրջանառվող տեղեկություններին, թե ինքը ԱԺ չի գնալու, վրդովված ասել էր, որ չի կարող այդպիսի բան լինել, ինքն ամենաշատ ձայներ հավաքած թեկնածուներից է, ժողովուրդը իրեն ձայն է տվել, և ինքը հիմա, ԱԺ չգնալով, ի՞նչ պատասխան պետք է տա իր ընտրողներին: «Ես գնալու եմ մինչև վերջ և տեր եմ կանգնելու իմ մանդատին»,- ասել էր Ազիզյանը: Այնուհետև ինչ-ինչ իրադարձություններից հետո Ազիզյանի տրամադրությունում փոփոխություններ կատարվեցին, և նա հայտարարեց, որ որոշողը Ծառուկյանն է. ինչպես որոշի՝ այնպես էլ կանի:
Այսօր «Առաջին լրատվական»-ը Ազիզյանից հետաքրքրվեց՝ որոշակիություն մտցվե՞լ է իր՝ ԱԺ գնալու հարցում: «Պարոն Ծառուկյանը ճիշտ որոշում է կայացնելու: Բայց դեռ չի կայացրել»,- ասաց Ազիզյանը՝ հավելելով, որ ինքը տեղյակ չի ընթացող քննարկումներից, տանից դուրս չի գալիս:
Մեր դիտարկմանը, որ Ծառուկյանն ասել էր, թե Դուք առողջական խնդիրներ ունեք, բուժվում եք, կարելի՞ է ենթադրել, որ հենց այդ հիմքով էլ իրեն ԱԺ չեն տանի, Ազիզյանը նկատեց. «Ես առողջական խնդիրներ չունեմ, ոտքս է ցավում պարզապես: Իսկ մնացածը որոշում է պարոն Ծառուկյանը: Բոլոր, կոնկրետ իմ քարոզարշավը ամբողջությամբ ինքն է ֆինանսավորել՝ և՛ ֆինանսապես, և՛ բարոյապես, հետևաբար ինքն էլ որոշելու է՝ ով գնա ԱԺ: Իսկ ես համոզված եմ, որ ճիշտ որոշում կկայացնի»,- ասաց Ազիզյանը:
Իսկ եթե Ծառուկյանը որոշի, որ Դուք ԱԺ-ում չեք լինելու, ի՞նչ պատասխան եք տալու Ձեր ընտրողներին՝ հարցրինք: «Իրավիճակը մի դարձրեք մի կաթիլ մեղրի պատմությունը: Ի՞նչ է եղել, որ ես էլ ընտրողներին պատասխան տամ: Կրկնում եմ՝ որոշողը Ծառուկյանն է, և ես վստահ եմ ճիշտ որոշում կլինի: Որոշումից հետո նոր կխոսենք»,- եզրափակեց Ազիզյանը: