Ռուսաստանի ԱԳՆ-ի Տեղեկատվության և հրատարակչության դեպարտամենտի ղեկավարի տեղակալ Արտեմ Կոժինը, ադրբեջանական ԶԼՄ-ների համար մեկնաբանելով Արցախում դատապարտված ադրբեջանցի դիվերսանտ Դիլհամ Ասկերովի գործը (վերջինս Ռուսստանի և Ադրբեջանի քաղաքացի է), նշել է, որ նա ականջալուր չի եղել ռազմական և հակամարտող գոտիներ այցերից զերծ մնալու ՌԴ-ի կոչերին:
«Ղարաբաղյան հակամարտության գոտին այն վայրերի թվում է, որտեղ այցելելուց ՌԴ քաղաքացիներին խորհուրդ է տրվում ձեռնպահ մնալ: Այդուհանդերձ, մենք սկզբունքորեն դեմ ենք այս կամ այն տարածք լրագրողների կամ քաղաքացիների խաղաղ այցերը քրեականացնելուն: Ինչ վերաբերում է կոնկրետ Ասկերովին, ապա հարկ է նշել, որ նա, ավելի ուշ նաև Լապշինը, անտեսել է ԱԳՆ-ի այդ խորհուրդը», – ասված է հարցուպատասխանի տեքստում, որը հրապարակել է ՌԴ արտգործնախարարության պաշտոնական կայքէջը:
Նա ադրբեջանական ԶԼՄ-ներին, մասնավորապես, haqqin.az-ին, խորհուրդ է տվել դադարեցնել Ասկերովի գործի շուրջ քարոզչական աղմուկ բարձրացնելը:
«Մենք հաստատ չգտիենք՝ արդյոք Բաքվում իմացել են, որ ՌԴ քաղաքացին մտադիր է հակամարտության գոտի այցելել: Բայց փաստ է, որ ԼՂ-ում Ասկերովի ձերբակալությունից հետո մենք ադրբեջանական իշխանություններից ենք ստացել նրա անձնագիրը: Չեմ կարող նաև վստահաբար ասել՝ արդյոք Ասկերովին խրախուսել են խախտել Ռուսաստանի ԱԳՆ-ի հրահանգը: Չէ՞ որ նա ինչ-որ կերպ անցել է վերահսկվող շփման գիծը»,-ընդգծել է ռուս պաշտոնյան: