Երևանի տոնավաճառների աշխատակիցներն այսօր կրկին հավաքվել են Կառավարության շենքի դիմաց՝ բողոքի ակցիա իրականացնելու: Նրանք 15 հոգանոց խումբ են կազմել և հանդիպել կառավարության ներկայացուցիչների հետ:
Հանդիպմանը մասնակցած առևտրականներից մեկը, դիմելով բողոքի ակցիայի մասնակիցներին, տեղեկացրեց. «Շատ բարեհամբույր ընդունեցին մեզ, մեր խոսքը լսեցին, ամեն ինչ՝ սևը սպիտակի վրա հասկացրեցինք:
Կարևորը՝ էլ ոչ մեկի չեն նեղացնի, չեն պատրաստվում նեղացնել: Իրենք էլ են ուզում, որ ժողովրդի համար լավ լինի. այսօր այդպես են տրամադրված:
Հանգիստ խճով գնացեք ձեր տները, մենք կկազմակերպենք, մասնագետների՝ իրավաբանների, տնտեսագետների հետ խորհրդակցելով՝ կձևակերպենք, կներկայացնենք առաջարկը, մեր առաջարկը խելքին մոտիկ է, մենակ ժամանակ է պահանջվում: Մենք կհամագործակցենք հօգուտ պետության և հօգուտ ժողովրդի»:
Հիշեցնենք, որ անցյալ շաբաթավերջին «Սուրմալու», «Փեթակ» և «Առինջ մոլ» առևտրի կենտրոնների աշխատակիցները բողոքի ակցիա էին իրականացրել կառավարության դիմաց՝ հայտարարելով, որ հարկային մարմինները ստուգումներ են իրականացնում իրենց տաղավարներում և հաճախորդներից պահանջում փաստաթղթեր: Առևտրականների վկայությամբ, ապրանքների փաստաթղթավորումը լրացուցիչ բեռ է, քանի որ պետք է նոր աշխատող ընդունեն, որն ի վիճակի կլինի կատարել այդ աշխատանքները:
Աշխատակիցների առաջարկներից մեկն այն է, որ սահմանին մաքսերը վճարելուց հետո վճարեն ևս 1.5 տոկոս, որից հետո Հարկայինն իրենց ազատի թղթաբանությունից:
Մանրամասները՝ տեսանյութում:
