Արտաշատի բժշկական կենտրոնի պոլիկլինիկայի վարիչ Սերինե Հայրապետյանն ազատվել է զբաղեցրած պաշտոնից: Հիշեցնենք, որ դեռ խորհրդարանական ընտրություններից առաջ Արարատի մարզպետն իր մոտ էր հրավիրել Սերինե Հայրապետյանին, ասել, որ նա Արտաշատի պոլիկլինիկայում հակաքարոզչությամբ է զբաղվում, որ կոլեկտիվից կան դիմում-բողոքներ, ու այդ պատճառով էլ նա ազատված է աշխատանքից: Հայրապետյանը փորձել էր պաշտպանել իր իրավունքները, բողոքի ձայն էր բարձրացրել, ինչից հետո հայտարարվեց, որ նա շարունակելու է աշխատել, ու որ մարզպետին թյուրիմացության մեջ գցողներ էին եղել: Սակայն ընտրություններից հետո պարզ է դարձել, որ պոլիկլինիկայի վարիչը պաշտոնանկ է արվել «պոլիկլինիկայում իրականացված ստուգումների արդյունքում հայտնաբերված չարաշահումների համար»:
Սերինե Հայրապետյանը Armtimes.com-ի հետ զրույցում ասել է, որ ինքը ոչ մի բանից տեղյակ չէ, թե ինչ չարաշահումների մասին է խոսքը, իրեն որևէ փաստաթուղթ ցույց չեն տվել, սակայն այդ փաստաթղթերի հիման վրա տնօրենը ազատման հրաման է տվել: Հայրապետյանը նշել է, որ ամեն ինչ միտումնավոր է արվել, քանի որ երբ ինքն ինքնակամ դիմում է գրել, որ ազատվի աշխատանքից, դրանից անմիջապես հետո ստուգումները դադարեցվել են, բայց երբ 3 օր անց փոշմանել է և հետ է վերցրել դիմումը, ստուգումները նորից վերսկսվել են, ինչը ապացուցում է, որ ամեն ինչ իր դեմ է եղել: Հայրապետյանը պատրաստվում է դիմել դատարան:
Արտաշատի պոլիկլինիկայի տնօրեն Սոկրատ Հախվերդյանն «Առաջին լրատվական»-ի հետ զրույցում հաստատեց, որ Հայրապետյանի ազատման պատճառը ստուգումների արդյունքում հայտնաբերված չարաշահումներն են եղել, բայց չմանրամասնեց, թե կոնկրետ ինչ չարաշահումների մասին է խոսքը՝ պատճառաբանելով, որ ինքը չի տիրապետում այդ մանրամասներին, դրան ավելի լավ ծանոթ են իրավաբանները:
Մեր դիտարկմանը, թե ինքն է ստորագրել Հայրապետյանի ազատման հրամանը, չգիտի՞ ինչ է եղել հրամանի հիմքում, Հախվերդյանը պատասխանեց. «Ինչ-ինչ չարաշահումներ են եղել, բայց դրան ավելի լավ տիրապետում են իրավաբանները»:
Դիտարկմանը, որ ի սկզբանե էլ պարզ էր, որ Հայրապետյանի ազատման հիմքում քաղաքական դրդապատճառներ են, մարզպետը ևս խոսել է դրա մասին, տնօրենը պատասխանեց. «Ես այդ քաղաքական հարցերին չեմ կարող պատասխանել, այդ ժամանակահատվածում չեմ աշխատել, ես նշանակվել եմ այդ դեպքերից հետո և այդ իրավիճակին չեմ տիրապետում»:
Պոլիկլինիկայի նախկին տնօրեն Վարդան Հայրապետյանն էլ մեզ հետ զրույցում ասաց, որ ինքն այլևս չի ցանկանում այդ թեմայով խոսել, այդ դեպքերից հետո ինքն ազատվել է աշխատանքից առողջական խնդիրների պատճառով, հիմա էլ Եվրոպայում բուժման կուրս է անցնում:
Նշենք, որ այս օրերին էլ պոլիկլինիկայում ստուգումներ են իրականացվում: Հախվերդյանն ասաց, որ դրանում ոչ մի արտառոց բան չկա, իր նշանակումից հետո ստուգումներ են, աուդիտ պետք է արվի, որպեսզի իրական վիճակը գնահատվի: