Բրիտանական հեղինակավոր The Independent պարբերականի թղթակից Ռոբերտ Օ՝Քոննորի անդրադարձը արցախյան ֆուտբոլին հիստերիա է առաջացրել Ադրբեջանում: Իր հոդվածում Օ՝Քոննորը նկատել էր, որ Արցախի՝ ՈՒԵՖԱ-ի անդամ դառնալը ոչ միայն կնպաստի ֆուտբոլի զարգացմանը, այլև կօգնի երկրին դուրս գալ շրջափակումից: Հոդվածում նշվում էր, որ մինչև 2006 թվականը Արցախում ֆուտբոլ ըստ էության չի եղել, սակայն վերջին տարիներին լայն թափով զարգանում է և դառնում մասսայական: Նշվում էր նաև, որ այս տարվանից արտասահմանցի մարզիչները և մասնագետները կաջակցեն արցախյան ֆուտբոլին միջազգային ասպարեզ դուրս գալու, ինչպես նաև ապաշրջափակման հարցում:
«Արցախի ֆուտբոլի ասոցիացիան հետևողական աշխատանքներ է տանում, որպեսզի պաշտոնապես ճանաչվի ՈՒԵՖԱ-ի կողմից: Վստահ եմ, որ մի գեղեցիկ օր ֆուտբոլի Արցախի ազգային հավաքականը կմասնակցի Եվրոպայի և աշխարհի առաջնության ընտրական մրցաշարերին»,- Արցախի ֆուտբոլի ասոցիացիայի նախագահ Սամվել Կարապետյանի խոսքերը մեջբերել էր The Independent:-ը
Եվ ահա, հոդվածի հրապարակումից հետո Ադրբեջանի արտաքին գործերի նախարարությունը անցանկալի անձանց սև ցուցակում է ներառել Օ՝Քոննորին: Հարևան երկրի ԱԳՆ-ի պաշտոնական ներկայացուցիչ Հիքմեթ Գաջիևի նախաձեռնությամբ էլ The Independent-ը «Սպորտը հեռու պահեք քաղաքականությունից» վերնագրով հոդված է հրապարակել՝ ներկայացնելով ադրբեջանական կողմի մեկնաբանությունը Օ՝Քոննորի դիտարկման վերաբերյալ:
Գաջիևի խոսքով՝ Արցախի՝ ՈՒԵՖԱ-ի անդամ դառնալու, ինչպես նաև ազգային հավաքական ունենալու հեռանկարը կարող է ծանր հարված հասցնել ոչ միայն Ադրբեջանին, այլև միջազգային կանոնադրությանը: «Աղդամի «Ղարաբաղը» միակ ֆուտբոլային գաղթականն է աշխարհում, իսկ Արցախն ուզում է դառնալ ՈՒԵՖԱ-ի անդամ»՝ նման վերնագրով հրապարակումներով ողողված է ողջ ադրբեջանական մամուլը:
«Լեռնային Ղարաբաղի օկուպացիայի հետևանքով Աղդամի «Ղարաբաղը» աշխարհում միակ ֆուտբոլային ակումբն է, որը հանդես է գալիս ոչ իր հարազատ քաղաքում: «Ղարաբաղ» թիմը քաղաքական տարր չէ: Մենք հույս ունենք, որ տարածաշրջանում նորից կտիրի խաղաղություն, և Լեռնային Ղարաբաղի հայկական և ադրբեջանական համայնքները Ադրբեջանի տարածքային ամբողջականության շրջանակներում ֆուտբոլային մրցումներ կանցկացնեն»,- Գաջիևի խոսքերը մեջբերել է բրիտանական պարբերականը:
Ու թեև Գաջիևը պատասխան հրապարակումը վերնագրել է «Սպորտը հեռու պահեք քաղաքականությունից»՝ նրա դիտարկումը «Ղարաբաղ» ֆուտբոլային ակումբի վերաբերյալ ոչ այլ ինչ է, քան քաղաքական շահարկում: «Ղարաբաղ» ֆուտբոլային թիմը հիմնվել է 1951 թվականին և կրել է «Մեխսուլ» անվանումը: Վերջինս այնուհետև վերանվանվել է «Շաֆագ»: 88-ական թվականներին, երբ սկսվեց Ղարաբաղյան շարժումը, Աղդամի թիմն ունեցել է «Կոպերատոր» անվանումը, ու միայն Արցախի ազատագրումից հետո է թիմը կոչվել «Ղարաբաղ»: Սա սպորտը քաղաքականացնելու ամենաիրական և էժանագին հնարքներից մեկն էր, ինչը նկատել է նաև The Independent պարբերականի թղթակիցը:
Սպորտը քաղաքականացնելու դրսևորում է նաև ֆուտբոլային ակումբը գաղթական անվանելը: Նկատենք նաև՝ Աղդամի «Ղարաբաղը» միակ թիմը չէ աշխարհում, որ հանդես է գալիս այլ քաղաքում՝ ինչպես նշել էր Ադրբեջանի արտաքին գործերի նախարարության պաշտոնական ներկայացուցիչը: Արդեն մի քանի տարի է՝ պատերազմի և քաղաքական կոնֆլիկտի պատճառով իրենց հարազատ քաղաքներում ելույթ չեն ունենում Դոնեցկի և Լուգանսկի ինքնահռչակ հանրապետությունների թիմերը: Մասնավորապես, Լուգանսկի «Զարյան», ինչպես նաև Դոնեցկի «Շախտյորը» թե Ուկրաինայի առաջնության և թե եվրագավաթների հանդիպումները անցկացնում են Զապորոժյեում, Խարկովում և այլ քաղաքներում: «Շախտյորի» և «Զարյայի» Ուկրաինայի առաջնությանը մասնակցելը և այս երկրի այլ քաղաքներում հանդես գալը ֆուտբոլը քաղաքականությունից զերծ պահելու լավագույն օրինակներից է: