Եվրամիությունը Մեծ Բրիտանիայից կպահանջի որպես փոխհատուցում վճարել երկու միլիարդ դոլար, քանի որ բրիտանական իշխանություններն ի վիճակի չեն եղել Brexit-ից հետո պայքարել մաքսային խախտումների դեմ: Այս մասին հաղորդում է Times թերթը՝ վկայակոչելով բարձրաստիճան պաշտոնյաներին:
Պարբերականի աղբյուրի խոսքով՝ ԵՄ-ում կարծում են, որ Մեծ Բրիտանիայի հարկերի և մաքսատուրքերի վարչությունը չի կարողանում խանգարել խմբավորումներին, մասնավորապես չինական, որոնք նվազեցնում են բրիտանական Դուվր և Ֆելիքսթոու քաղաքներից ԵՄ ներմուծվող ապրանքների գները: Այդ խմբավորումները միլիարդավոր ֆունտ ստեռլինգի հասնող մաքսատուրքեր և ավելացրած արժեքի հարկեր չեն վճարում:
«Այդ խարդախությունը շարունակվում է մինչև օրս, և Բրիտանիան գիտի այդ մասին: Այդ ամենի մասին կբարձրաձայնվի առևտրի հարցով բանակցությունների ժամանակ և կազդի ԵՄ-ի և Բրիտանիայի մաքսային հարաբերությունների վրա»,-ասել է ԵՄ բարձրաստիճան անանուն պաշտոնյան: