«Սիրիայի դեմոկրատական ուժեր» զինված կոալիցիայի ջոկատները հարձակում են նախաձեռնել Ռաքքայի վրա, որտեղ գտնվում է ԴԱԻՇ ահաբեկչական խմբավորման գլխավոր հենակետը։ Ինչպես հայտնել է կոալիցիայի ներկայացուցիչ Ջիհան Շեյխ-Ահմեդը՝ «Եփրատի ցասում» ծածկանվամբ գործողության 4-րդ փուլի մեկնարկից ի վեր 12 օրում քուրդ մարտիկները ոչնչացրել են ԴԱԻՇ-ի 84 վարձկանի, ներառյալ դաշտային հրամանատար Աբու Սումեյային։
Նրանց օդից աջակցություն է ցուցաբերում ԱՄՆ-ի գլխավորած կոալիցիայի օդուժը՝ փոխանցում է Firate գործակալությունը։
Գործողությունը սկսվել է հիմնական ճանապարհների փակումից, որոնք կապում են Ռաքքան Հալեպի, Դամասկոսի և Դեր Զորի հետ։ Ներկայում քրդական ուժերն ազատագրել են Ռաքքայի մատույցներում 2 քաղաք և ավելի քան 20 գյուղ ու ֆերմա։
