Ավտոմեքենայում, որի պատճառով Ֆրանսիայի արևելյան Բեզանսոն քաղաքի ընտրատեղամասերից մեկից մարդիկ տարհանվել էին, կարաբին է հայտնաբերվել: Այս մասին հայտնում է France Info պորտալը:
ԶԼՄ-ների տեղեկությամբ՝ ընտրատեղամասը նորից բաց է ընտրողների համար:
«Խոսքն ահաբեկչության մասին չէ, դա պարզ իրավախախտում է»,- մեջբերում է պորտալը տեղի իրավապահ մարմինների ներկայացուցչի խոսքերը:
Գողացված համարվող ավտոմեքենան թողնված է եղել ընտրատեղամասի մոտ միացված շարժիչով: Դեպքի վայր են ժամանել սակրավորներ, բայց պայթյունի վտանգը չի հաստատվել:
Հաղորդվում է նաև, որ նույնանման դեպք է արձանագրվել Պա-դե-Կալե դեպարտամենտում: Դեպքի վայր ժամանած մասնագետները ոչ մի վտանգ չեն հայտնաբերել: Այդ ընտրատեղամասի աշխատանքը ևս վերսկսվել է:
Այսօր Ֆրանսիայում նախագահական ընտրությունների առաջին փուլն է ընթանում: Ընտրություններին կարող է մասնակցել մոտ 47 մլն մարդ:
Սպասվում է, որ առաջին պաշտոնական նախնական արդյունքները հայտնի կդառնան մինչև կեսգիշեր:
