Մեծ Բրիտանիայի իշխող Պահպանողական կուսակցության ժողովրդականությունը արտահերթ խոհրդարանական ընտրությունների նախաշեմին կտրուկ նվազել է մինչև 40%: Այս մասին վկայում են Mail on Sunday թերթի հրապարակած՝ Survation ընկերության հարցման արդյունքները:
Այս միտումը կարող է կապված լինել ընտրություններից հետո հարկերի հնարավոր բարձրացման հետ: Հասարակության շրջանում սուր արձագանք է առաջացրել նաև Մեծ Բրիտանիայի վարչապետ Թերեզա Մեյի անսպասելի հայտարարությունը, ով հրաժարվել է նահանջել կուսակցական գծից, որը նախատեսում է ազգային եկամտի 0,7%-ը հատկացնել արտասահմանում օգնություն ցուցաբերելու համար: Ընդդիմադիր Լեյբորիստական կուսակցությունը կարողացել է այդ ֆոնին մեծ թվով կողմնակիցների գրավել, հիմա նրա օգտին պատրաստ է քվեարկել հարցվածների 29%-ը: Այդպիսով վերջին մի քանի օրում լեյբորիստներին հաջողվել է մոտ 2 անգամ կրճատել տարբերությունը Պահպանողական կուսակցությունից:
Նախընտրական վարկանշային ցուցակի երրորդ տեղը բաժանում են լիբերալ դեմոկրատները և Միացյալ Թագավորության Անկախության կուսակցությունը՝ 11% աջակցությամբ:
Բրիտանիայի վարչապետը խորհրդարանական արտահերթ ընտրություններ է նշանակել հունիսի 8-ին: