«Ազգային ճակատ» կուսակցության առաջնորդ Մարին Լե Պենը և նախկին վարչապետ Ֆրանսուա Ֆիյոնը դուրս կգան Ֆրանսիայի նախագահական ընտրությունների երկրորդ փուլ: Այս մասին հայտնի է դառնում բելգիական Libre.Be պարբերականի հրապարակած հարցման արդյունքներից:
Հարցման տվյալներով՝ Լե Պենը կստանա ընտրողների քվեների 26%-ը, Ֆիյոնը՝ 22%-ը:Երկրի էկոնոմիկայի նախկին նախարար Էմանուել Մակրոնը երրորդը կլինի ընտրողների ձայների 21%-ով:
Պարբերականը չի նշում ուսումնասիրությունը կատարած կազմակերպության անունը:
Այսօր առավոտյան Ֆրանսիայում նախագահական ընտրությունների առաջին փուլում քվեարկության համար ավելի քան 66 500 ընտրատեղամաս է բացվել: Ընտրություններին կարող է մասնակցել մոտ 47 մլն մարդ:
Նոր նախագահի անունը ֆրանսիացիները կիմանան մայիսի 7-ից հետո, երբ կանցկացվի երկրի ղեկավարի ընտրությունների երկրորդ փուլը:
