Ադրբեջանցիները տոնում են Էրդողանի հաղթանակը Թուրքիայում ապրիլի 16-ին սահմանադրական հանրաքվեին: Լարիսա Ալավերդյանի կարծիքով՝ այս հանգամանքը արցախա-ադրբեջանական շփման գծում ադրբեջանական դիպուկահարների ակտիվացման և հրադադարի պահպանման ռեժիմի խախտումների հիմնական պատճառներից մեկն է: Մյուս հանգամանքն այն է, որ մոտենում Հայոց ցեղասպանության տարելիցի օրը՝ ապրիլի 24-ը:
ՀՀ ԱԺ նախկին պատգամավորը «Առաջին լրատվական»-ի հետ զրույցում նշեց, թե փաստորեն արդարացել են իր այն կասկածները, որ եթե Թուրքիան ու Ադրբեջանը ազդեցություն ունենան միմյանց վրա, ապա դա հանգեցնելու է միայն հետընացի, և Թուրքիայի վերջին իրադարձությունները հենց դա են ցույց տալիս:
«Դա [ապրիլի 24-ը] անպայման պիտի նշվի Ադրբեջանում նոր հանցագործություններով: Չմոռանանք, որ անգամ Էրդողանը, որը թվում է, թե ավելի զուսպ պիտի լիներ, իր ճառերից մեկում ասաց, թե «մենք հաղթել ենք նրանց, ում ծովն էինք նետում 100 տարի առաջ, մենք հաղթել ենք խաչակիրներին»: Այս ամենը շատ համահունչ են իրար: Ադրբեջանի ու Թուրքիայի մերձեցման գործընթացն ավելի է խորանում՝ գնալով դեպի կոշտացում այլոց, նախ և առաջ՝ հայերի հանդեպ»:
Ինչ վերաբերում է Ադրբեջանի ընդհանուր քաղաքականությանը ղարաբաղյան հարցում, ապա Լարիսա Ալավերդյանի խոսքով՝ ադրբեջանական կողմը երբևէ չի հրաժարվել Արցախը ուժով գրավելու մտադրությունից, ավելին՝ մշտապես հայտարարում է Լեռնային Ղարաբաղը ուժով վերադարձնելու իր իրավունքի մասին, եթե բռնակցումը հնարավոր չլինի իրականացնել բանակցությունների միջոցով:
«Ադրբեջանը երբևէ չի ընդունել իր գործողությունների հակաիրավական լինելը կամ երբևէ չի ասել, որ պատրաստ է ինչ-ինչ նոր մոտեցումների: Ընդհակառակը, խոսելով «սուբստանտիվ բանակցությունների» մասին՝ դրա մեջ դնում է միայն մեկ իմաստ, այն է՝ տարածքների բռնի վերակցումը Ադրբեջանին»,- նշեց Լարիսա Ալավերդյանը:
