Թեև նոյեմբերին «Սասնա ծռեր» խմբավորման գործից 12 մեղադրյալների մասով նախաքննության ավարտ էր հայտարարվել, սակայն փաստաբանները երեկ գրություն են ստացել առ այն, որ նախաքննությունը վերսկսվել է: Այդ մասին «Առաջին լրատվական»-ի հետ զրույցում ասաց Արամ Մանուկյանի փաստաբան Ինեսսա Պետրոսյանը. «Պավել Մանուկյանի և մյուսների գործով նախաքննությունը վերսկսվել է: Այսինքն՝ այն, որ հայտարարվել էր նախաքննության ավարտ 2016-ին և պետք է ուղարկվեր դատարան, հիմա լրացուցիչ քննչական գործողություններ կատարելու համար քննությունը վերսկսվել է»,-ասաց փաստաբանը:
Նրա խոսքով՝ սա նշանակում է, որ քննչական գործողություններ են պլանավորվում կատարել այդ գործով:
Ծանրացվել է նաև Արամ Մանուկյանի մեղադրանքը: Նա մեղադրվում էՔրեական օրենսգրքի հինգ հոդվածով, ասինքն՝ ՔՕ-ի 235-րդ հոդվածի 3-րդ մասի և 219-րդ հոդվածի 3-րդ մասի 1-ին կետով, ավելացել է նաև 218-րդ հոդվածի (պատանդ վերցնելը) 3-րդ մասի 1-ին կետը, 238-րդ հոդվածի (զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը) 4-րդ մասի 1-ին և 2-րդ մասի և 185-րդ հոդվածի (գույքը դիտավորությամբ ոչնչացնելը կամ վնասելը) 4-րդ մասի 1-ին և 2-րդ կետերով:
Ինեսսա Պետրոսյանը նշեց, որ նրանք քաղաքական հայացքների համար հետապնդվող անձինք ենք, մեղադրանքնները շինծու են և ապօրինի:
«Եվ վաղուց իշխանություններն այս գործով պետք է վերջնական որոշումներ ունենային, այն է՝ քրեական հետախուզության դադարեցում այդ անձանց նկատմամբ»,-հավելեց փաստաբանը:
Ինեսսա Պետրոսյանը, ով նաև Անդրիաս Ղուկասյանի փաստաբանն է, նշեց, որ խստացվել է նաև Անդրիաս Ղուկասյանի մեղադրանքը:
Հիշեցնենք, որ օգոստոսի 1-ին Անդրիաս Ղուկասյանին մեղադրանք առաջադրվեց 225 հոդվածի առաջին մասով՝ զանգվածային անկարգություն հրահրելու հատկանիշներով: Այս մեղադրանքին ավելացել են 34-219 3-րդ մասի առաջին կետով, 34-218 3-րդ մասի առաջին կետով և 34-235 3-րդ մասով: «Մեղադրում են նրանում, որ նա ցանկացել է մտնել ՊՊԾ գնդի տարածք, գրավել շենքեր-շինություններ, տրանսպորտային միջոցներ, ռազմամթերք կրել, պատանդներ պահել»,- ասաց Անդրիաս Ղուկասյանի մյուս փաստաբան Կարեն Մեժլումյանը:
Վերաքննիչ դատարանը օրերս մերժել է Արայիկ Խանդոյանի՝ Միայնակ Գայլի, բողոքը՝ վերացնել տեսակցությունների արգելքն ու թույլատրել նրան հանդիպել: Նրա փաստաբան Արա Ղարագյոզյանը «Առաջին լրատվական»-ի հետ զրույցում նշեց՝ քանի որ հայտարարվել է նախաքննության ավարտ, այս պահին որևէ գործողություն չի արվում, քանի որ փաստաբանները քրեական գործի նյութերին են ծանոթանում:
Նրա խոսքով՝ իրենց բողոքն անընդհատ մերժվում է.«Առաջին իսկ պահից իրավական ենթատեքստ չկա: Եթե իրավական ենթատեքստ լիներ, գոնե ընտանիքի անդամների տեսակցության սահմանափակումը կվերացվեր, քանի որ ընտանիքի անդամները քրեական գործով ոչ որպես վկա էին ներգրավված և ոչ էլ կարող էին նախաքննության համար կարևոր նշանակություն ունենալ, բայց սահմանափակում են՝ սրանով ցույց տալով, որ Սասնա ծռեր խմբավորման անդամների նկատմամբ արդարադատություն չեն իրականացնում՝ ընդհուպ նախագահող դատարավորը, ով մահացավ, ինչը շատ ցավալի է, բայց ինքը դռնփակ դատավարություն անցկացրեց»,-հավելեց Արա Ղարագյոզյանը:
Փաստաբանի խոսքով՝ դատական նիստերի սկսվելուց հետո անմիջապես պարզ կդառնա՝ ինչպես է դատական գործընթացն իրականանում, բայց շուտով կլրանա գործի մեկ տարին, որ այդ գործողություններն ընթանում են, բայց որևէ դրական գործընթաց Սասնա ծռերի գործով չի կատարվում:
Արա Ղարագյոզյանի խոսքով՝ հիմա ծանոթանում են քրեական գործի նյութերին, Սասնա ծռերի բոլոր գործերում միջնորդությունները դատարանի կամայական որոշմամբ մերժվել են: