Բարաք Օբամայի հետնախագահական արձակուրդը վերջանալու վրա է: Ֆրանսիական Պոլինեզիայում մի քանի շաբաթ անցկացնելուց հետո, երկուշաբթի օրը Օբաման կվերադառնա Չիկագո, մասնակցելու առաջին հասարակական միջոցառմանը որպես նախկին նախագահ: Այդ մասին հայտնում է The New York Times-ը:
Երդման արարողությունից հետո նրա լռությունը կավարտվի մի շարք միջոցառումներով՝ հաջորդ չորս շաբաթների ընթացքում: Երկուշաբթի օրը Չիկագոյի համալսարանում ուսանողների հետ հանդիպմանը կհետևի Բոստոնում մրցանակաբաշխության արարողությունը. մի շարք ելույթներ, ինչպես նաև անհատական հանդիպումներ ԱՄՆ-ում և Եվրոպայում, ինչպես նաև Գերմանիայում հանդիպում կանցլեր Անգելա Մերկելի հետ:
Սակայն Օբամայի կողմնակիցներին, որոնք անհամբեր սպասում են նախկին նախագահի պատասխանին նրա իրավահաջորդի մեղադրանքներին և քաղաքականության հակադարձումներին, հավանաբար հիասթափություն է սպասվում:
Նույնիսկ, եթե նա ականատես է լինում իր ժառանգության վրա նախագահ Թրամփի անգութ և քաոսային հարձակումներին, Օբաման հավատարիմ է մնում այն գաղափարին, որ կա միայն մեկ նախագահ: Նրա մտերմներն ասում են, որ նախկին նախագահը մտադիր չէ դիմակայել Թրամփին ներգաղթի, առողջապահության, արտաքին քաղաքականության կամ շրջակա միջավայրի պաշտպանության հարցերում իր որևէ միջոցառումներում:
Օբաման և Սպիտակ տան նրա նախկին օգնականների փոքր թիմը գիտեն, որ նա հրապարակավ ինչ էլ ասի, որքան էլ որ քողարկված լինի, կմեկնաբանվի որպես քննադատություն Թրամփին:
Օբամայի օգնականները ասում են, որ նա չի քննադատի Թրամփին՝ նույնիսկ վճարովի մասնավոր ելույթներում: Նրանք չեն հայտնել, թե որքան է Օբաման ստանալու ամեն ելույթի համար, սակայն նախկին նախագահ Բիլ Քլինթոնը 2001-ից 2015 թվականներին ամեն ելույթի համար միջին հաշվով ստացել է ավելի քան 200 հազար դոլար, իսկ Ջորջ Բուշ կրտսերը` 100 հազարից 175 հազար դոլար:
Օգնականները հերքում են այն գաղափարը, որ Օբաման պետք է ակտիվորեն պայքար մղի Թրամփի դեմ, ում հետ նա չի խոսել երդման արարողությունից հետո:
Դրա փոխարեն Օբաման պատարստում է ելույթ, որը կկենտրոնանա ավելի լայն թեմաների` քաղաքացիական ներգրավվածության, մոլորակի առողջության, դիվանագիտության անհրաժեշտության, քաղաքացիական իրավունքների և երիտասարդ ամերիկացի առաջնորդների նոր սերնդի զարգացման շուրջ:
Օբաման առաջին նախագահը չէ, ով փորձում է խուսափել քաղաքական վեճերից: Ջորջ Բուշ կրտսերը դիմադրել է իր օգնականների և կողմնակիցների ճնշմանը` Օբամայի կողմից պաշտոնը ստանձնելուց հետո ամիսներ անց քննադատելու իր հաջորդին:
Սակայն, շատ հազվադեպ է հեռացող նախագահը հանդիպել պարոն Թրամփի նման իրավահաջորդի:
Նախագահի պաշտոնին անցնելուց շաբաթներ անց Թրամփը հավաքել է կաբինետ` նպատակադրված Օբամայի ձեռքբերումների մեծ մասը արմատախիլ անելու: Արդեն որպես նախագահ Թրամփը մեղադրեց նախկին նախագահին իրեն գաղտնալսելու մեջ` առանց որևէ վկայության, և նա Twitter-ում գրեց, որ Օբաման «վատ (կամ հիվանդ) մարդ է»: Թրամփը նաև մեղադրել է Օբամային Սիրիայի քիմիական հարձակումների համար:
Թրամփի հետ կռվի մեջ մտնելու նպատակով Օբամայի վրա ճնշումը կայուն կերպով աճում էր, երբ Թրամփը հակադարձեց Օբամայի ժամանակաշրջանի շրջակա միջավայրի պաշտպանության քաղաքականությանը, արգելեց մի քանի մուսուլմանական երկրներից մուտքը ԱՄՆ, հրաժարվեց առևտրային գործարքներից և այլն:
Չնայած այդ ամենին, Օբաման հիմնականում մնացել է լուռ:
