«Օհանյան-Րաֆֆի-Օսկանյան» դաշինքի ճակատագիրը շարունակում է անորոշ մնալ։
Դաշինքի անդամներն այդպես էլ չեն հստակեցնում՝ արդյոք ՕՐՕ-ն կպահպանի իր ֆորմատը, արդյոք այն կդառնա կուսակցություն, թե անդամ ուժերը կշարունակեն առանձին գործել, և պաշտպանության նախկին նախարար Սեյրան Օհանյանը կստեղծի սեփական կուսակցությունը ։
Ըստ որոշ տեղեկությունների՝ այս պահին Հայաստանում չեն ո՛չ Րաֆֆի Հովհաննիսյանը, ո՛չ Վարդան Օսկանյանը և ո՛չ էլ Սեյրան Օհանյանը։ «Համախմբում» և «Ժառանգություն» կուսակցությունների ներկայացուցիչներն էլ այս օրերին ակտիվ քաղաքական գործունեությամբ և հարցազրույցներով հանդես չեն գալիս։ Մեզ հաջողվեց պարզել, որ դաշինքն առաջիկա՝ Երևանի ավագանու ընտրություններում որևէ քաղաքական ուժի չի սատարելու՝ ո՛չ ուղղակի, ո՛չ էլ անուղղակի աջակցություն չի լինելու։
«Համախմբում» կուսակցության վարչության անդամ Գեղամ Նազարյանից հետաքրքվեցինք՝ արդյոք ՕՐՕ դաշինքն առաջիկայում քննարկում կամ հավաք է անցկացնելու՝ կուսակցություն դառնալ-չդառնալու կամ դաշինքի ֆորմատի պահպանման հետ կապված. «Անկեղծ ասած, ես տեղյակ չեմ։ Գուցե անձնական խոսակցություններ կան, բայց ես տեղյակ չեմ, որպեսզի պատասխան տամ»։
Հարցին, թե ինչո՞վ է պայմանավորված դաշինքի լռությունը, Գեղամ Նազարյանն արձագանքեց. «Երևի մարդիկ ուզում են հասկանալ՝ այս ամենից հետո ինչ կարելի է անել։ Բայց կոնկրետ քննարկումներ չեն լինում»։
«Ժառանգություն» կուսակցության վարչության անդամ Սուսաննա Մուրադյանից ևս հետաքրքրվեցինք՝ արդյոք առաջիկայում դաշինքի ներկայացուցիչները կհավաքվեն՝ որոշելու հետագա գործունեության ֆորմատը։ Ավելի վաղ հիշեցնենք, Մուրադյանն «Առաջին լրատվական»-ի հետ զրույցում կարծիք էր հայտնել, որ ՕՐՕ-ն իր ֆորմատը կպահպանի։ Իսկ այսօր տիկին Մուրադյանը փոխանցեց հետևյալը. «Որևէ առարկայական բան չեմ կարող ասել այդ կապակցությամբ, եթե լինի՝ կիմանաք։ Այս պահի դրությամբ ոչ մի այդպիսի բան չկա»։
Ի դեպ, դաշինքի հետ կապ չեն պահպանում նաև «Ազատամարտիկների դաշինքի» խորհրդի ներկայացուցիչները, որոնք ընտրություններից հետո իրենց ավանդական չորեքշաբթի օրերի նիստերն են անցկացնում իրենց դաշինքի գրասենյակում՝ առանց ՕՐՕ դաշինքի մասնակից կուսակցությունների ներկայության։