ՀՀ կառավարության այսօրվա նիստի օրակարգային հարցերին անցնելուց առաջ վարչապետ Կարեն Կարապետյանն անդրադարձավ «Մաքուր Հայաստան» ծրագրին, որը վերաբերվում է Հայաստանի ողջ տարածքում աղբահանության խնդրին:
Վարչապետը դիմելով ոստիկանության պետ Վլադիմիր Գասպարյանին՝ ասաց. «Պարոն Գասպարյան, խնդրում ենք ձեզանից՝ այսօր չունենալով տույժ տուգանք, ուղղակի մեր ոստիկանության գործընկերներին խնդրում ենք մաքսիմալ կանխարգելման միջոցառումները…, ոնց պատկերացնում են… բռնում ենք, ասում ենք՝ լսի, հավաքի՝ գնա»:
Վլադիմիր Գասպարյանը հակադարձեց. «Այստեղ ամենակարևոր խնդիրն առաջին մասն է: Որտեղ հիմա կեղտոտ է, պետք է միանգամից սկսվի այդ աշխատանքները, եթե պետք է օժանդակենք, բայց մաքրեն, որովհետև ոստիկանին դժվար կլինի, երբ բերում է, մեքենայի թափքը բացում է, աղբը թափում է «տրասայի» վրա, մոտենա, ասի, որ դուք տուգանվում եք կամ և այլն, և այլն: Մենք ապարդյուն խոսակցություն ենք ստեղծում: Հակաճառելու են, բայց մենք արդեն զբաղվում ենք»: