Հայրենասիրական դաստիարակությունն ամրապնդելու համար քաղաքացու մեջ առաջին հերթին պետք է ամրապնդել երկրի տիրոջ զգացումը: Դա Սերժ Սարգսյանի միտքն է, որ նա արտահայտել է ազգ-բանակ համաժողովի իր ելույթում:
Համաժողովն անցկացվում է պաշտպանության նախարարության նախաձեռնությամբ, իսկ ազգ-բանակ հայեցակարգի հեղինակն էլ, ինչպես հայտնի է, պաշտպանության նախարար Վիգեն Սարգսյանն է: Ավելի ճիշտ կլինի ասել՝ ոչ թե Սարգսյանն է հեղինակը, այլ նախաձեռնությունը գալիս է նրանից, քանի որ ազգ-բանակ հայեցակարգը վաղուց հայտնի և աշխարհի տարբեր երկրներում կիրառվող հայեցակարգ է: Վիգեն Սարգսյանն այն պարզապես հնչեցրել է Հայաստանում, այն էլ՝ իշխանության մակարդակում, քանի որ հասարակական-քաղաքական այլ հարթակներում այդ գաղափարի կիրառման, այդ հայեցակարգին անցնելու անհրաժեշտության մասին խոսվել է շատ:
Դժվար է ասել՝ ապրիլյան պատերա՞զմն էր ազգ-բանակ հայեցակարգի իշխանական նախաձեռնության պատճառը, թե՞ դա առիթ էր, իսկ պատճառը այլ է՝ ներիշխանական խնդիրներն ու, այսպես ասած, 2018-ի խնդրի հանգուցալուծումը, որտեղ ազգ-բանակ հայեցակարգը Սերժ Սարգսյանի համար իր քաղաքական ծրագրերի և մտադրությունների առաջմղման կարևոր և ազդեցիկ միջոցներից մեկն է:
Մի բան հստակ է, որ Հայաստանը պարտադրված է ապրել ու զարգանալ այդ հայեցակարգի պայմաններում: Այլ հարց է, թե ինչպիսի կոնկրետ կիրառում պետք է ունենա այդ հայեցակարգը, ինչպիսին պետք է լինի այդ հայեցակարգի պայմաններում, այսպես ասած, իշխող էլիտան: Որովհետև, օրինակ, երբ ներկայումս Հայաստանի տնտեսությունը պատկանում է ընդամենը մի քանի տասնյակ անձի, կենտրոնացած է մի քանի տասնյակ ընտանիքի ձեռքում, բայց Սերժ Սարգսյանը խոսում է տիրոջ զգացումով հայրենասեր քաղաքացի ունենալու մասին, ապա դա առաջացնում է միաժամանակ ծիծաղ ու մտահոգություն: Ծիծաղ, որովհետև Սերժ Սարգսյանի ելույթն ու իրականությունը որևէ ընդհանուր կապ չունեն, իսկ մտահոգություն, որովհետև Հայաստանը գտնվում է փաստացի պատերազմի պայմաններում, և կա՛մ իրականությունից նման կտրվածությունը, կա՛մ, առավել ևս, իրականությունը նման կերպ գիտակցաբար աղավաղելու ցինիզմը հավասարապես սպառնալիքի տակ են դնում Հայաստանի անվտանգությունը ռազմավարական հեռանկարի առումով:
Թե Հայաստանում իրականում ովքեր են տերերը, ովքեր են տիրոջ զգացումով ապրողները՝ չափազանց ցցուն կերպով արտացոլվեց օրերս հրապարակված ձայնագրությունում, որտեղ ներկայացված էր այն երևույթը և գործընթացը, որի շնորհիվ Սերժ Սարգսյանի կուսակցության գլխավոր ներկայացուցիչը ապահովում է իր ներկայությունը Հայաստանի այլևս թիվ մեկ քաղաքական կառավարման ինստիտուտում՝ խորհրդարանում:
Հայաստանի քաղաքացին իր հայրենիքում հայտնվել է ստրկացած վիճակում՝ օբյեկտիվ ու սուբյեկտիվ մի շարք հանգամանքների բերումով, որոնց, իհարկե, ոչ բոլորի համար պետք է անմիջական պատասխանատվությունը դնել իշխանության վրա, բայց որոնց գլխավոր պատասխանատուն անկասկած իշխանությունն է, քանի որ իշխանությունն ունի այդ իրավիճակը էապես և արագ փոխելու անհրաժեշտ լծակները և նաև սահմանադրական պարտավորությունը:
Դա է ազգ-բանակի ճանապարհը, դա է անվտանգության ճանապարհը, սեփական երկրում սահմանադրորեն պաշտպանված, օրենքով պաշտպանված քաղաքացուց է սկսվում պետության արտաքին պաշտպանության կառուցումը, ոչ թե գեղեցիկ կառուցված ելույթներից: Որքա՞ն այդպիսի ելույթներ են հնչել Սերժ Սարգսյանի շուրթերից ապրիլի քառօրյա պատերազմին նախորդած տարիներին:
Լուսանկարը՝ Photolure-ի